अंगणवाडी कर्मचाऱ्यांना सरकारी दर्जा देऊन कायम करण्याचा ठराव…

मुंबई :-गुजरात मधील अंगणवाडी कर्मचाऱ्यांना सरकारी कर्मचारीचा दर्जा द्यावा,असा आदेश गुजरात उच्च न्यायालयाने दिला आहे.त्याच धर्तीवर इतर राज्यातील सरकारने अंगणवाडी कर्मचाऱ्यांना सरकारी दर्जा देऊन कायम करावे,असा ठराव मंजूर करुन अंगणवाडी कर्मचाऱ्यांना ग्रॅज्युटी लागू करावी,अशी मागणी दिल्ली येथील अखिल भारतीय अंगणवाडी सेविका मदतनीस फेडरेशनच्या (सीटू) राष्ट्रीय परिषदेत करण्यात आली.

तालकटोरा स्टेडियम येथे झालेल्या परिषदेत २५ राज्यातील अंगणवाडी सेविका मदतनीस सहभागी झाले होते.राष्ट्रीय सेक्रेटरी तपन सेन यांच्या हस्ते या परिषदेचे उद्घाटन झाले.कर्मचाऱ्यांच्या मागण्या मंजूर होईपर्यत लढण्याचा निर्धार यावेळी करण्यात आला.

फेडरेशनच्या सदस्या संगिता कांबळे यांनी सांगितले की,केरळ खासदार जॉन ब्रिटास,व्ही शीवदासन ए.के. रहीम यांनी अंगनवाडी सेविकांच्या प्रश्नावर संसदेत आवाज उठवण्याचे आश्वासन दिले.यावेळी अर्थतज्ञ व जेएनयू प्रा.उत्सा पटनाईक,गुजरात उच्च न्यायालयात अंगणवाडी सेविका,मदतनीस यांची बाजु भक्कमपणे मांडणारे जेष्ठ कायदेतज्ञ,वकील तसेच ऑल इंडिया वकील संघटनेचे राष्ट्रीय सरचिटणीस ॲड.सुरेंद्रनाथ यांनी मार्गदर्शन केले.राष्ट्रीय अध्यक्षा उषा राणी यांनी यावेळी प्रास्ताविक केले.