स्वगावी परतणाऱ्या बापलेकीवर काळाचा घाला; अपघातात दोघेही जागीच मृत्यू..

गोंदिया :-चिमुकलीसह स्वगावी परतणाऱ्या बापलेकीवर काळाने घाला घातला असल्याची घटना दोन दिवसांपूर्वी म्हणजेच शुक्रवारी गोंदिया जिल्ह्याच्या सडक अर्जुनी तालुक्यातील खडकी बाम्हणी येथे रात्री ९ वाजताच्या सुमारास घडली.

पत्नीला माहेरी सोडून आपल्या मुलीसोबत स्वगावी देवरी येथे परतणाऱ्या दुचाकीचालकाला खासगी बसने (ट्रॅव्हल्स)धडक दिली.दिलेली धडक इतकी भीषण होती की,दुचाकीचालक वडिलांसह चिमुकलीचा जागीच मृत्यू झाला.सूरजलाल वसाके वय ३३ वर्षे व वेदिका सूरजलाल वसाके वय ७ वर्षे, दोन्ही रा.देवरी असे मृत झालेल्या बापलेकीचे नाव आहे.सूरजलाल व त्यांची मुलगी सडक अर्जुनी तालुक्यातील कोहमाराकडून देवरीला दुचाकीने जात होते.यादरम्यान,देवरीच्या दिशेने भरधाव येणाऱ्या सीजी-१९एफ-०३२६ क्रमांकाच्या खासगी बसने त्यांच्या दुचाकीला जोरदार धडक दिली.धडकेत वडील व मुलगी दोघांचाही दुर्दैवी मृत्यू झाला.अपघातानंतर बाम्हणी-खडकी येथील व परिसरातील संतप्त नागरिकांनी सुमारे ४ तास रास्ता रोको आंदोलन केले. दरम्यान,देवरीचे उपविभागीय पोलिस अधिकारी विवेक पाटील यांनी घटनास्थळ गाठून संतप्त नागरिकांची समजूत घातली व महामार्गावरील वाहतूक सुरळीत केली.