शेतशिवारात आढळून आला अज्ञात महिलेचा अर्धवट जळालेला मृतदेह..

गोंदिया :-एका अज्ञात महिलेचा अर्धवट जळालेला मृतदेह गोंदिया जिल्ह्याच्या गोरेगाव तालुक्यातील देऊटोला-बबई कालव्याजवळ शेतशिवारात आज,सोमवार १० फेब्रुवारीला सकाळच्या सुमारास आढळून आल्याने परिसरात एकच खळबळ माजली.

याबाबत अधिक माहिती अशी की,गोरेगाव तालुक्यातील देऊटोला-बबई येथील काही शेतकरी आज सोमवार सकाळच्या सुमारास शेतबांधावर गेले असता शेत परिसरात काहीतरी जळत असल्याचे दिसून आले. त्यामुळे जवळ जाऊन बघितले असता एका अज्ञात महिलेच्या अंगावर तणस व त्यावर चादर टाकून पेटविण्यात आल्याचे दिसून आल्याने एकच धांदल उडाली.सदर घटनेची बातमी गावात वाऱ्यासारखी पसरताच गावकऱ्यांनी एकच जमाव केला.घटनेची माहीती गोरेगाव पोलिस प्रशासनास देताच घटनास्थळी गोरेगाव पोलीस ठाण्याचे पोलीस निरीक्षक अजय भुसारी ताफ्यासह घटनास्थळी दाखल झाले.घटनास्थळाची पाहणी करून अर्धवट जळालेल्या मृतदेहाचा पंचनामा करण्यात आला.अज्ञात महिलेचा चेहरा व वरील भाग पूर्णपणे जळालेला आहे.पोलिसांनी दिलेल्या माहितीनुसार,सदर अज्ञात महिलेचे अंदाजे वय २३ ते ३० वर्षाच्या आत असून महिला कोण? तिला जाळून मारण्याचा प्रयत्न कां व कुणी केला,हे पुढील तपासाअंती कळणार असल्याचे गोरेगाव पोलिसांनी स्पष्ट केले.