मृत निवृत्त कर्मचाऱ्यांना दाखवले जिवंत; कोट्यवधी रुपयांचा पेन्शन घोटाळा… – पंचायत समितीतील महिला कर्मचारी बडतर्फ..

नागपूर :-मृत निवृत्त कर्मचाऱ्यांना जिवंत दर्शवून त्यांची पेन्शन हडपून कोट्यवधी रुपयांचा घोटाळा करणाऱ्या पारशिवनी पंचायत समितीमधील निलंबित महिला कर्मचारी संगीता नेवारे यांना जिल्हा परिषदेच्या सेवेतून बडतर्फ करण्यात आले आहे. नागपूर जिल्हा परिषदेअंतर्गत येणाऱ्या पारशिवनी पंचायत समितीमधील शिक्षण विभागात हा घोटाळा झाला होता.या प्रकरणात पोलिसात गुन्हा दाखल करण्यात आला होता.या घोटाळ्यातील मुख्य सूत्रधार लिपीक संगीता नेवारे वर्षानुवर्षे पेन्शन टेबल हाताळत होती.बरीच वर्ष एकाच टेबलावर काम करीत होत्या. मृत निवृत्त कर्मचाऱ्यांना जिवंत दाखवून त्यांचे पेन्शन हडपण्याची शक्कल लढवली होती.ही रक्कम नातेवाइकांच्या बँक खात्यात वळती केली जात होती. या प्रकरणात नेवारे यांच्यासह सहा जणांना अटक करण्यात आली होती.आर्थिक गुन्हे शाखेकडे या प्रकरणाचा तपास देण्यात आला होता.दरम्यान, समितीने केलेल्या चौकशीदरम्यान हा घोटाळा तब्बल २ कोटी ७२ लाखांच्या घरात असल्याचे उघडकीस आले होते.त्यामुळे घोटाळ्यातील मुख्य आरोपी संगीता नेवारे यांना जिल्हा परिषदेच्या सेवेतून बडतर्फ करण्यात आले असून प्रशासनाने घोटाळ्याची रक्कम संगीता नेवारे हिच्याकडून वसूल करण्याचे निर्देश  दिले आहेत.