उद्रेक न्युज वृत्त
कुरखेडा (गडचिरोली) :- कुरखेडा तालुक्यातील सोनसरी येथील महिला पोलिस पाटलांना शिवीगाळ करत मारहाण करणाऱ्या पिता – पुत्रांची काल,१६ मे रोजी चंद्रपूर कारागृहात रवानगी झाली.
सुमित्रा वालदे या सोनसरी गावच्या पोलिस पाटील आहेत.महिनाभरापूर्वी गावात एका व्यक्तीचा तलावात बुडून मृत्यू झाला होता.पोलिस पाटील म्हणून सुमित्रा वालदे यांनी याची माहिती कुरखेडा पोलिसांना कळवली होती.त्यानंतर पोलिसांनी धाव घेतली होती. दरम्यान,घटनास्थळाकडे जाताना त्याच दिवशी पोलिस पाटील सुमित्रा वालदे व कोतवाल फिरोज हलामी यांना अडवून हुज्जत घालत गावातील पिता-पुत्राने मारहाण केली होती.पोलिसांना माहिती का दिली,असा जाबही त्यांनी विचारला होता.पोलिस पाटील सुमित्रा वादले यांच्या तक्रारीवरुन शासकीय कामात अडथळा,मारहाण,अश्लील शिवीगाळ प्रकरणी दोन्ही आरोपींवर गुन्हा नोंदविला होता.तब्बल महिनाभराने कुरखेडा पोलिसांनी त्यांना ताब्यात घेतले.दिलीप बाबूराव मडावी वय ४१ वर्षे व महेश दिलीप मडावी वय २२ वर्षे अशी त्यांची नावे आहेत. त्यांना १६ मे रोजी न्यायालयात हजर करण्यात आले. न्यायालयाने त्यांची रवानगी न्यायलयीन कोठडीत केली.त्यानंतर त्यांना चंद्रपूर जिल्हा कारागृहात पाठवले,असे सहायक निरीक्षक दिनेश गावंडे यांनी सांगितले.
