बापाच्या डोळ्यादेखत विद्युत तारेचा शॉक लागून मुलाचा मृत्यू…

जळगाव :-शेतात बकऱ्यांसाठी चारा घेण्यास गेलेल्या १२ वर्षीय महेश अनिल सूर्यवंशी या चिमुकल्याला शेतात तुटलेल्या वीजेच्या तारेचा शॉक लागला.यामध्ये जागेवरच या मुलाचा मृत्यू झाला.सदरची घटना आज, शुक्रवार १६ ऑगस्टला सकाळी चाळीसगांव तालुक्यातील वाकडी शिवारात घडली.या घटनेत मुलाचे वडील देखील थोडक्यात बचावले.बापाच्या डोळ्यादेखत मुलाचा मृत्यू झाल्याचा हृदय पिवळटून टाकणाऱ्या या घटनेची बातमी वाऱ्यासारखी गावात पसरली.सदर घटनेबद्दल सर्वत्र हळहळ व्यक्त होत आहे.त्याचवेळी आमदार मंगेश चव्हाण हे वाकडी गावात आले होते.आमदार चव्हाण यांना घटनेची माहिती मिळताच त्यांनी तात्काळ घटनास्थळ गाठून त्यांनी उपस्थित वीज वितरण कंपनी व पोलीस प्रशासन यांना सूचना देवून घटनेचा पंचनामा केला.

सदर प्रसंगी आमदार मंगेश चव्हाण यांनी बालकाचा मृतदेह हा चाळीसगाव येथील ग्रामीण रुग्णालयात नेला.वाकडी गाव हे आमदार यांच्या मामाचे गाव असल्याने त्यांचे या गावाशी जवळचे नाते आहे.

झालेली घटना अतिशय दुर्दैवी असून यात जे कोणी दोषी आढळतील त्यांच्यावर कारवाई करण्याच्या सूचना आमदार मंगेश चव्हाण यांनी यावेळी दिल्या. महेशच्या दुर्दैवी मृत्यूने सूर्यवंशी कुटुंबावर जो दुःखाचा डोंगर कोसळला आहे,जे नुकसान झाले ते न भरून निघणारे आहे.मात्र वीज वितरण कंपनी व शासनाकडून तसेच वैयक्तिक पातळीवर जास्तीत जास्त मदत मृताच्या कुटुंबियांना मिळवून देण्याचे आश्वासन आमदार चव्हाण यांनी दिले.