चिमुकल्यासह महिलेची गळफास घेऊन आत्महत्या.!

जळगाव :-सर्वत्र गणेशोत्सवाचा आनंद साजरा होत असतांनाच जळगाव जिल्ह्यातून एक अत्यंत हृदयद्रावक घटना समोर आली आहे.गणेशोत्सवाच्या पहिल्याच दिवशी एका ३० वर्षीय विवाहितेने आपल्या अवघ्या चार वर्षाच्या चिमुकल्यासह गळफास लावून आत्महत्या केल्याची धक्कादायक घटना काल सोमवारच्या सायंकाळी जळगाव शहरातील दशरथनगर परिसरातील तळेले कॉलनीत उघडकीस आली.हेमांगी निखिल महाजन वय ३० वर्षे व शौर्य निखिल महाजन वय ४ वर्षे अशी मृत माय-लेकाची नावे आहेत.मृत हेमांगी महाजन यांचे माहेर जळगाव जिल्ह्याच्या धरणगाव तालुक्यातील बांभोरी गाव  असून,त्यांच्या वडिलांचे यापूर्वीच निधन झाले आहे.त्यांचे पती निखिल महाजन हे भारतीय सैन्यदलात कार्यरत असून सध्या राजस्थान येथे सेवा बजावत आहेत.तर त्यांचे दीर तळेले कॉलनीतील गणेश मंडळाचे अध्यक्ष आहेत.

घटनेपूर्वी घरात गणपती बाप्पाच्या मूर्तीची स्थापना आणि पूजेची तयारी सुरू होती.घरातील सर्व सदस्य पूजेच्या गडबडीत असतांना हेमांगी महाजन या मुलाला घेऊन खोलीत गेल्या.पूजेची वेळ झाल्याने कुटुंबीय त्यांना बोलावण्यासाठी गेले असता खोलीचा दरवाजा आतून बंद होता.बराच वेळ आवाज देऊनही आतून काहीच प्रतिसाद न मिळाल्याने संशय बळावला.कुटुंबीयांनी तातडीने शनिपेठ पोलिसांना माहिती दिली.पोलिसांनी घटनास्थळी दाखल होत दार उघडून पाहिले असता माय-लेकाने गळफास घेतल्याचे निष्पन्न झाले.दोघांनाही तातडीने शासकीय वैद्यकीय महाविद्यालय व रुग्णालयात नेण्यात आले,मात्र वैद्यकीय अधिकाऱ्यांनी त्यांना तपासून मृत घोषित केले.याप्रकरणी शनिपेठ पोलिस ठाण्यात अकस्मात मृत्यूची नोंद करण्यात आली असून आत्महत्येचे कारण अद्याप अस्पष्ट आहे.पोलिसांनी पुढील तपास सुरू करून आत्महत्येचे कारण व इतर बाबींचा तपास सुरू केला आहे.घटनेने परिसरात हळहळ व्यक्त केली जात आहे.