फुल तोडायला तलावात उतरलेल्या तरुणाचा दुर्दैवी मृत्यू..!

भंडारा :-कमळाचे फुल तोडायला तलावात उतरलेल्या तरुणाचा दुर्दैवी मृत्यू झाल्याची घटना भंडारा जिल्ह्याच्या साकोली तालुक्यातील निलज गाव नजिक असलेल्या तलाव परिसरात काल,मंगळवार २१ ऑक्टोंबर रोजी सायंकाळच्या सुमारास घडली असून आज,बुधवार २२ ऑक्टोंबरला सकाळच्या सुमारास शवविच्छेदन अहवाल तयार करून मर्ग दाखल करण्याची प्रक्रिया पोलिसांनी पार पाडली. प्रतिक सुखदेव शेंडे वय १९ वर्षे,रा.निलज, ता.साकोली,जि.भंडारा असे तलावात बुडून मृत पावलेल्या तरुणाचे नाव आहे.ऐन दिवाळी सणाच्या दिवशीच घडलेल्या घटनेने कुटुंबीयांसह गावात शोककळा पसरली आहे.

प्रतीक शेंडे हा काल मंगळवारी घरी लक्ष्मीपूजनाचा कार्यक्रम असल्याने सायंकाळी साडेपाचच्या सुमारास दोन मित्रांसोबत गाव नजिक असलेल्या तलाव परिसरात कमळाची फुले आणण्यासाठी गेला होता.दरम्यान, कमळाचे फुल तोडण्यासाठी तलावात उतरला असता खोल पाण्यात गेला.पाण्यातून बाहेर येण्याचा प्रयत्न करीत असतांनाच तो तलावातील इतर झाडांच्या वेलित अडकला.यातच प्रतीकचा तलावात बुडून मृत्यू झाला. घटनेची माहिती मित्रांनी ग्रामस्थांना देताच गावकऱ्यांनी घटनास्थळ गाठून साकोली पोलिसांना माहिती दिली. पोलिसांनी पथकासह घटनास्थळी दाखल होत मृतदेह साकोली उपजिल्हा रुग्णालयात दाखल करून पुढील प्रक्रिया पार पाडून मर्ग दाखल केला.ऐन दिवाळी सणात तरुणाचा मृत्यू झाल्याने शेंडे कुटुंबियांवर दुःखाचे डोंगर कोसळले आहे.