प्रतिबंधीत नायलॉन मांजाची विक्री; ब्रम्हपुरी पोलिसांची कारवाई..

ब्रम्हपुरी(चंद्रपूर):-प्रतिबंधीत नायलॉन मांजाची साठवणूक करून विक्री करणाऱ्या एका दुकानदाराच्या आज,शनिवार १० जानेवारी रोजी ब्रम्हपुरी पोलिसांनी मुसक्या आवळल्या.प्रकरणी ब्रम्हपुरीच्या बालाजी वार्ड येथील दिलीप रामचंद्र गजपुरे याच्यावर ब्रम्हपुरी पोलीस ठाण्यात पर्यावरण संरक्षण अधिनियम १९८६ अंतर्गत कलम ५ व १५ अन्वये गुन्हा दाखल करून दुकानातून ३५ हजार रुपयांचा नायलॉन मांजाचा साठा जप्त करण्यात आला आहे.

आज शनिवारी ब्रम्हपुरी पोलीस स्टेशन हद्दीतील अवैध प्रतिबंधीत नायलॉन मांजा विक्री करणाऱ्या दुकानदारांचा शोध घेत असतांनाच पोलिसांना गोपनीय माहिती मिळाली की,ब्रम्हपुरीच्या बालाजी वार्ड येथील दिलीप रामचंद्र गजपुरे हा आपल्या ‘ओमकार डेली निड्स’ दुकानात प्रतिबंधीत नायलॉन मांजाची विक्री करतो आहे. या माहितीच्या आधारे पोलिसांनी सापळा कारवाई करत संबंधित दुकानाची झडती घेतली.झडतीदरम्यान,पतंग उडविण्यासाठी वापरण्यात येणारा,मानवी जीवितास तसेच पर्यावरणास गंभीर धोका निर्माण करणारा प्रतिबंधीत नायलॉन मांजा मोनो केटीसी व मोनो फाईटर  प्रकारातील एकूण ३० प्लास्टिक चक्री बंडल,अंदाजे किंमत ३५ हजार रुपये,अवैधरित्या विक्रीसाठी साठवून ठेवलेला आढळून आला.प्रकरणी ब्रम्हपुरी पोलीस ठाण्यात गुन्हा दाखल करण्यात आला आहे.