पात्र लाडक्या बहिणींना जुलै महिन्याचा हप्ता लवकरच.. – २६ लाख ३४ हजार अर्जदारांचा लाभ तात्पुरत्या स्वरूपात स्थगित..

उद्रेक न्युज वृत्त :-मुख्यमंत्री लाडकी बहीण योजना महायुती सरकारसाठी लाभदायक जरी ठरली असली तरी या योजनेसाठी मोठी रक्कम लागत असल्याने सरकारच्या दमछाक होऊ लागले आहे.अश्यातच शासनाची दिशाभूल करून चुकीच्या पद्धतीने लाडकी बहीण योजनेचा लाभ घेणाऱ्या बनावट लाभार्थ्यांवर कारवाई करण्यात येणार असल्याचे महिला व बालकल्याण मंत्री आदिती तटकरे यांनी म्हटले आहे. महिला व बाल विकास विभागाने आज,बुधवार ३० जुलै रोजी शासन निर्णय जारी करत लाडकी बहीण योजनेच्या जुलै हप्त्यासाठी तब्बल २ हजार ९८४ कोटींचा निधी वितरित केला असल्याने येत्या दोन ते तीन दिवसांत पात्र लाडक्या बहिणींना जुलै महिन्याचा हप्ता खात्यात जमा होणार असल्याची शक्यता वर्तविण्यात येत आहे.त्यातच मुख्यमंत्री माझी लाडकी बहीण योजनेअंतर्गत पात्र ठरलेल्या सर्व अर्जांची ओळख पटवण्यासाठी महिला व बालविकास विभागाने शासनाच्या सर्व विभागांकडून माहिती मागवली होती.यानुसार माहिती व तंत्रज्ञान विभागाने सुमारे २६ लाख ३४ हजार लाभार्थी अपात्र असतांना देखील लाडकी बहीण योजनेचा लाभ घेत असल्याची माहिती सादर केली आहे.यात काही लाभार्थी एकापेक्षा जास्त योजनांचा लाभ घेत असल्याचे,तर काही कुटुंबामध्ये २ पेक्षा जास्त लाभार्थी असल्याचे, तर काही ठिकाणी पुरुषांनी अर्ज केल्याच्या बाबी निदर्शनास आली आहे.या माहितीच्या आधारे जून २०२५ पासून या २६ लाख ३४ हजार अर्जदारांचा लाभ तात्पुरत्या स्वरूपात स्थगित करण्यात आला आहे. याव्यतिरिक्त पात्र असलेल्या सुमारे २.२५ कोटी पात्र लाडकी बहीण योजनेच्या लाभार्थ्यांना जून २०२५ महिन्याचा सन्माननिधी वितरित करण्यात आला आहे.तात्पुरत्या स्वरूपात लाभ स्थगित केलेल्या २६ लाख ३४ हजार लाभार्थ्यांच्या माहितीशी संबंधित जिल्हाधिकाऱ्यांकडून शहानिशा करून त्यापैकी जे लाभार्थी पात्र ठरतील त्यांचा लाभशासनातर्फे पुन्हा सुरू करण्यात येईल,असेही मंत्री तटकरे यांनी स्पष्ट केले आहे.