न्यायाधीशांसमोरच वकिलाला हृदयविकाराचा झटका.. – न्यायालयात युक्तिवाद करताना हृदयविकाराने मृत्यू…

नागपूर :-ॲड.तलत इक्बाल कुरैशी यांचा जिल्हा न्यायालयात युक्तिवाद करताना हृदयविकाराने मृत्यू झाल्याची घटना काल,शनिवारी सकाळी ११:३० च्या सुमारास घडली.घटनेमुळे विधी क्षेत्रात हळहळ व्यक्त केली जात आहे.ॲड.कुरैशी यांचा एका दिवाणी प्रकरणावर जिल्हा न्यायाधीश एस.बी.पवार यांच्यासमक्ष युक्तिवाद सुरू होता.

दरम्यान,त्यांना हृदयविकाराचा जोरदार धक्का बसला व ते खाली कोसळले.ते पाहून न्या.पवार लगेच डायसवरून खाली उतरले.त्यांनी कुरैशी यांना पाणी पाजले व स्वतःच्या कारने सदर येथील रुग्णालयात खासगी नेले.

त्यांच्या पाठोपाठ जिल्हा वकील संघटनेचे अध्यक्ष ॲड.रोशन बागडे व माजी अध्यक्ष ॲड.कमल सतुजा यांनीदेखील रुग्णालयात पोहोचून कुरैशी यांना तातडीने आवश्यक उपचार मिळण्यासाठी प्रयत्न केले, पण ते वाचू शकले नाहीत.कुरैशी हे प्रशांत कॉलनी, बोरगाव,गोरेवाडा रोड येथील रहिवासी होते; त्यांच्या पत्नीचे कोरोनामुळे निधन झाले आहे.त्यांच्या पश्चात दोन मुली व बराच मोठा आप्त परिवार आहे.