खासदार नामदेव किरसान यांचा एक फोन अन् यंत्रणा लागली कामाला…

कोरची(गडचिरोली):-कुरखेडा-कोरची या राष्ट्रीय महमार्गावर नेहमीच अवजड वाहनांची वर्दळ असते. या वाहतुकीमुळे शहरालगतच मोठ-मोठे खड्डे निर्माण झाल्याने वाहने फसण्याचे प्रकार वाढले होते.त्यामुळे वाहतूकदारांना कमालीचा मनस्ताप सहन करावा लागत होता.याची माहिती प्राप्त होताच खा.नामदेव किरसान यांनी संबंधित विभागाच्या अधिकाऱ्यांना भ्रमणध्वनीवरुन खड्डे बुजविण्याच्या सूचना दिल्या. खासदारांच्या आदेशानंतर अखेर या राष्ट्रीय महामार्गावरील खड्डे बुजविण्यात आल्याने सदर मार्गावरील प्रवास सुकर झाला आहे.कुरखेडा-कोरची राष्ट्रीय महामार्गावर चोवीस तास हलक्या तसेच जडवाहनांची वर्दळ असते.सद्यस्थितीत पावसाळ्याचे दिवस असून शहरातीलच ढाब्यानजीक अजवड वाहनांमुळे मोठ-मोठे खड्डे निर्माण झाले होते.यामुळे वाहने फसण्याचे प्रकार वाढीस आले.याचा फटका वाहन चालकांसह सर्वसामान्य नागरिकांनाही बसत होता.काही दिवसांपूर्वी संबंधित विभागामार्फत या खड्ड्यात माती टाकण्यात आली.त्यामुळे पुन्हा वाहने फसण्याचे प्रमाण वाढल्याने काँग्रेसचे तालुकाध्यक्ष मनोज अग्रवाल यांनी खा.किरसान यांना दूरध्वनीद्वारे संपर्क करून माहिती दिली होती.त्यानुसार खासदार किरसान यांनी दखल घेतल्याने मार्गाची दुरुस्ती करण्यात आली आहे.