देसाईगंज येथे रेल्वे रूळ ओलांडताना एका इसमाचा मृत्यू; मुंडके धडावेगळे..

देसाईगंज(गडचिरोली):-देसाईगंज शहरातील चुना भट्टी जवळील रेल्वे रूळ ओलांडताना रेल्वेच्या मालगाडीने धडक दिल्याने एका इसमाचा जागीच मृत्यू झाल्याची घटना काल,मंगळवार १५ एप्रिल रोजी सायंकाळी सहाच्या सुमारास घडली.नवलाजी ठवरे वय ५५ वर्षे,रा.हेटी बंगला,देसाईगंज,जि.गडचिरोली

असे रेल्वे अपघातात मृत पावलेल्या इसमाचे नाव आहे.

माहितीनुसार,नवलाजी ठवरे हे देसाईगंज शहरातील एका चहाच्या दुकानात काम करीत होते.काम आटोपल्यानंतर ते नेहमीप्रमाणे पायी-पायी आपल्या घराकडे निघाले होते.त्यांचे घर शहरातून जाणाऱ्या रेल्वेच्या पलीकडे असल्याने नवलाजी हे चुना भट्टी जवळील रेल्वे रूळ ओलांडत असतांना तितक्यातच गोंदियाकडून बल्लारशहाकडे जाणारी मालगाडी हॉर्न वाजवत आली.मात्र,नवलाजी यांना बरोबर ऐकू येत नसल्याने व वयोमानानुसार नीट चालता येत नसल्याने गाडीखाली सापडून त्यांचा जागीच मृत्यू झाला.रेल्वे रुळाचे चाक मानेवरून गेल्याने मुंडके धडावेगळे झाले व एक पाय तुटला.सदरची घटना काही नागरिकांनी प्रत्यक्ष डोळ्यादेखत बघितल्याचे प्रत्यक्षदर्शींनी सांगितले.घटनेची माहिती होताच बघ्यांनी मोठी गर्दी केली होती.याबाबत देसाईगंज पोलिसांना कळताच  घटनास्थळी धाव घेतली.मृतदेह ताब्यात घेत उत्तरीय तपासणीसाठी देसाईगंज ग्रामीण रुग्णालयात  पाठविला.