ताडोबात रेस्क्यू सेंटर बांधकामाच्या हालचालींना वेग..

नागपूर :-चंद्रपूर जिल्ह्याच्या ताडोबा-अंधारी व्याघ्र प्रकल्पाच्या बफर झोनमध्ये वर्चस्व असलेल्या छोटा मटकाची मागील वर्षाच्या बुद्ध पौर्णिमेला ‘ब्रम्हा’ वाघाशी झुंज झाली होती.या संघर्षात ब्रम्हा ठार झाला होता,तर छोटा मटका गंभीर जखमी झाल्याने त्याच्या पायाचे हाड मोडले होते.तो लंगडत असल्याचा व्हिडीओ व्हायरल झाल्यानंतर मुंबई उच्च न्यायालयाच्या नागपूर खंडपीठाने छोटा मटका वाघाच्या उपचारातील निष्काळजीपणाच्या पार्श्वभूमीवर स्वतःहून दखल घेत जनहित याचिका दाखल केली होती.सुरुवातीला छोटा मटकावर चंद्रपूर येथे उपचार सुरू होते.नंतर त्याला नागपूरच्या गोरेवाडा रेस्क्यू सेंटरमध्ये हलविण्यात आले होते.वन्य प्राण्यांतील संघर्ष,जखमी किंवा आजारी वन्यप्राण्यांवर त्वरित उपचार करणे,अनाथ बछड्यांचे संगोपन करणे वा इतर कारणांसाठी प्रकल्पात एक संपूर्ण आणि आधुनिक रेस्क्यू सेंटरची गरज अधोरेखित करण्यात आली. त्यानुसार,मुंबई उच्च न्यायालयाच्या नागपूर खंडपीठाच्या न्यायालयाने ताडोबा-अंधारी व्याघ्र प्रकल्पात रेस्क्यू सेंटर उभारण्यासाठी सर्वोच्च न्यायालयाकडून परवानगी घेण्याचे आदेश प्रधान सचिवांना दिले आहेत.ताडोबात एफडीसीएम म्हणजेच फॉरेस्ट डेव्हलपमेंट कॉर्पोरेशन ऑफ महाराष्ट्र यांच्या मार्फत रेस्क्यू सेंटरचे बांधकाम होणार आहे.सुनावणी दरम्यान ॲड.सांबरे यांनी नमुद केले की,प्रकल्पातील बांधकामासंदर्भात सर्वोच्च न्यायालयात याचिका प्रलंबित आहे.त्यामुळे ही अनुमती आवश्यक आहे.न्यायालयाने दोन आठवड्यांत कार्यवाही करण्याचे आदेश प्रधान सचिवांना दिले.तसेच सेंटरचे बांधकाम करणाऱ्या फॉरेस्ट डेव्हलपमेंट कार्पोरेशनला प्रधान सचिवांकडे अर्ज करण्याचे आदेशही दिले.दोन आठवड्यांत कार्यवाही पूर्ण होताच ताडोबातील रेस्क्यू सेंटर बांधकामाचा मार्ग मोकळा होऊन वन्य प्राण्यांवर वेळीच उपचार होण्यास मदत होईल.