ट्रॅक्टर डोझरने घेतला तरुणाचा बळी; वडील गंभीर जखमी..

भंडारा :-जिल्ह्याच्या लाखांदूर तालुक्यातील विरली(बु.) येथील आंबेडकर चौक परिसरात वळण घेणाऱ्या एका ट्रॅक्टर डोझरने दुचाकीला जोरदार धडक दिल्याने दुचाकीस्वार तरुणाचा जागीच मृत्यू झाला,तर पाठीमागे बसलेले वडील गंभीर जखमी झाल्याची घटना काल शनिवारी सकाळच्या सुमारास घडली.शंकर मुखरन बावनकुळे वय २९ वर्षे,रा.इटाण, ता.लाखांदूर असे अपघातात मृत्यू झालेल्या तरुणाचे नाव आहे.तर त्याचे वडील मुखरन बावनकुळे गंभीर जखमी झाले.शंकर व त्याचे वडील मुखरन हे दोघेही दुचाकीने भेंडाळा येथील नातेवाइकांच्या घरी मयतीसाठी जात होते.सकाळी नऊ वाजताच्या दरम्यान ते विरली(बु.)गावातील आंबेडकर चौकातून जात असतांनाच इटाण गावाच्या दिशेने वळण घेणाऱ्या एका ट्रॅक्टर डोझरने त्यांच्या दुचाकीला जोरदार दिली.धडक इतकी भीषण होती की,यात दुचाकीचा चक्काचूर झाली आणि डोझरचा लोखंडी रोडरही वाकला.यात शंकरचा याचा जागीच मृत्यू झाला,तर त्याचे वडील मुखरन गंभीर जखमी झाले.अपघात घडताच नागरिकांनी घटनास्थळी मोठी गर्दी केली.गर्दी होताच चालकाने वाहन सोडून घटनास्थळावरून पळ काढला. नागरिकांनी तातडीने दोघांनाही जवळच्या रुग्णालयात उपचारासाठी दाखल केले.डॉक्टरांनी तपासणीअंती शंकरला मृत घोषित केले.घटनेनंतर परिसरात काही काळ तणावाचे वातावरण निर्माण झाले होते. दरम्यान,घटनेची माहिती लाखांदूर पोलिसांना देण्यात आली.माहिती मिळताच लाखांदूर पोलिस ठाण्याचे ठाणेदार सचिन पवार पथकासह घटनास्थळी दाखल होत घटनेचा पंचनामा करीत तणावपूर्ण परिस्थिती नियंत्रणात आणली. घटनेने परिसरात शोककळा पसरली,मात्र आई-वडिलांनी अपघातात एकुलत्या एक मुलास खोवल्याने त्यांच्यावर दुःखाचा डोंगर कोसळला.