उद्रेक न्युज वृत्त
नवी दिल्ली :-दिल्लीमध्ये G-20 सम्मेलन होणार असल्याने सर्वत्र सुशोभीकरणाचे काम सुरु असून रस्त्यांच्या दुतर्फा फुलांच्या कुंड्या ठेवल्या जात आहेत.सदर रस्त्यांच्या दुतर्फा फुलांच्या कुंड्या चोरल्याचा एक व्हिडिओ सोशल मीडियावर चांगलाच व्हायरल झाला आहे.विशेष म्हणजे चोरटे श्रीमंत घरातले असून चाळीस लाखांच्या कारमधून त्यांनी ही चोरी केली.याप्रकरणी गुरुग्राम पोलिसांनी कारवाई करत एकाला अटक केली आहे.अटक करण्यात आलेल्या व्यक्तीचे नाव मनमोहन असे आहे.मनमोहनचा साथीदार नवाब सिंह हा फरार असून पोलीस त्याचा शोध घेत आहेत.
मनमोहन हा गुरुग्राममधल्या गांधी नगर परिसरात राहाणारा असून व्यवसायाने तो प्रॉपर्टी डिलर आहे. व्हायरल होणाऱ्या व्हिडिओतील कारच्या नंबर प्लेटमुळे पोलिसांनी आरोपी मनमोहनला अटक केली. ज्या अलिशान कारमधून कुंड्या चोरण्यात आल्या होत्या; ती कार मनमोहनच्या पत्नीच्या नावावर आहे. या प्रकरणातील दुसरा फरार आरोपी नवाब सिंह गुरुग्रामधल्या ॲथॉरिटी GMD पदावर कार्यरत आहे.
मनमोहन आणि नवाब सिंह हे आपल्या KIA CARNIVAL या कारमधून दिल्लीहून गुरुग्राममध्ये येत होते.कारची किंमत जवळपास ४० लाख रुपये इतकी आहे.कार गुरुग्राममध्ये आली असता त्यांना रस्त्याच्या एका बाजूला सुंदर फुलांच्या कुंड्या ठेवलेल्या दिसल्या.या कुंड्या चोरण्याचा मोह त्यांना झाला.त्यांनी रस्त्याच्या कडेला कार थांबवली आणि काही कुंड्या कारमध्ये टाकल्य आणि तिथून फरार झाले.पण त्यांची हे कारमाने एका व्यक्तीने आपल्या मोबाईलमध्ये रेकॉर्ड केले.याची कल्पना त्यांना मुळीच नव्हती.सदर प्रकार मोबाईलमध्ये चित्रित करणाऱ्या व्यक्तीने व्हिडिओ सोशल मीडियावर अपलोड केला आणि बघता बघता सोशल मीडियावर तुफान व्हायरल झाला.
