चारचाकी वाहनातुन दारु तस्करी; देसाईगंज पोलिसांची धडक कारवाई.. -९ लाख रुपयांचा मुद्देमाल हस्तगत..

देसाईगंज(गडचिरोली):-गडचिरोली जिल्ह्यात दारु बंदीचा पुरता फज्जा उडाला आहे.दारूबंदी असलेल्या जिल्ह्यात वर्षाकाठी कोट्यवधी रुपयांची अवैध दारू पकडली जाते.मात्र,दारूची तस्करी थांबण्याचे नावच घेत नाही.कारण मागणी आणि पुरवठा यांचा तात्काळ ताळमेळ बसत असल्यानेच गोरखधंद्याचा खेळ सुरू झालाय.त्यातच,झटपट श्रीमंतीच्या नादात दारु तस्कर  चक्क महागड्या चारचाकी वाहनांचे वापर करुन दारु तस्करीचा गोरखधंदा करण्याची क्लूप्ती आखु लागलेत. मागील काही दिवसांपुर्वीच देसाईगंज पोलीस प्रशासनाने दारु बंदीची प्रभावी अंमलबजावणी करण्यासाठी तालुक्यातील तब्बल तीन दारुविक्रेत्या महिलांवर हद्दपार करण्याची कार्यवाही केली.पण,इजी मनी कमविण्याच्या नादात दारु विक्रेते महागड्या चारचाकी वाहनांचा वापर करुन दारु तस्करीची क्लूप्ती आखत असले तरी देसाईगंज पोलीसांनी अवैध दारु तस्करीवर अंकुश लावण्यासाठी यशस्वी मोहीम हाती घेत दोन दारू तस्करांच्या मुसक्या आवळल्या आहेत.

याबत अधिक माहिती अशी की,देसाईगंज तालुक्यातील कुरुड रोड लगत एक ‘एक्सयूव्ही’ चारचाकी वाहन क्रमांक-एमएच ४६ पी ५४५९ हे भरधाव वेगाने येत असुन या वाहनातुन दारु तस्करी होत असल्याची गोपनीय माहिती काल रविवारी देसाईगंज पोलीस ठाण्याचे पोलिस निरिक्षक स्वप्निल इजप्पवार यांना मिळाली.माहिती मिळताच पोलीस पथकाने तात्काळ घटनास्थळी धाव घेत सापळा रचला.सदरचे वाहन मार्गावर येताच वाहनास थांबवून तपासणी केली असता त्यात प्रवरा कंपनीच्या २५ पेट्या देशी दारु आढळून आली.सदरचा मुद्देमाल वाहुन नेणारे गुरुविंदर सिंग तेजसिंग डांगी वय २८ वर्षे,रा.जोगापुर, ता.गोंडपिंपरी,जि.चंद्रपूर व हरगोविंदसिंग डांगी रा.डोंगरगांव,ता.आरमोरी, जि.गडचिरोली या दोन दारु तस्करांना ताब्यात घेतले.या कारवाईत पोलिसांनी महागडे ‘एक्सयूव्ही’ चारचाकी  वाहन व २५ पेट्या देशी दारु असा एकुण ९ लाख रुपयांचा मुद्देमाल जप्त केला.सदरची कारवाई देसाईगंज पोलीस ठाण्याचे पोलिस निरीक्षक स्वप्नील इजपवार यांचे मार्गदर्शनाखाली सहाय्यक पोलीस निरीक्षक मनिष गोडबोले,फौजदार नितेश कढव,राजू उराडे,शैलेश तोरपकवार,ताटलावार,सचिन शेरेकर,शैलेश कसारे, प्रदिप भसारकर यांनी पार पाडली.