गडचिरोलीहून चामोर्शी जातांना अपघात; दोघांचा घटनास्थळीच मृत्यू..

गडचिरोली :-दिवसेंदिवस अपघातांची मालिका संपता संपेना..! काही जणांना वाहने जोरात चालविण्याची सवय जडलेली दिसून येते.आजची तरुणाई सुसाट वाहने पळवून मोठ्या अपघातांना सामोरे जातांना दिसून येत आहे.आपण अपघातांकडे एक नजर टाकली तर सर्वात जास्त होणारे अपघात हे तरुणांचेच,असे हल्ली निदर्शनास येऊ लागले आहे.अश्यातच आज,रविवार ११ मे रोजी दुपारच्या सुमारास गडचिरोली-चामोर्शी महामार्गावरील कुरुड गावाजवळील वळणावर मोठा अपघात घडला.यात दोन तरुण घटनास्थळीच गतप्राण झाले.प्रतीक निळकंठ निमसरकार वय २६ वर्षे,रा.आष्टी, ता.चामोर्शी,जि.गडचिरोली व सचिन विनायक रोहनकर वय २६ वर्षे, रा.गणेशनगर,चामोर्शी,असे घटनास्थळीच मृत्यू झालेल्या दोन तरुणांची नावे आहेत.

माहितीनुसार,प्रतीक निमसरकार व सचिन रोहनकर हे दोघेही गडचिरोली वरून दुचाकी क्रमांक-एमएच ३३ झेड २०४८ ने चामोर्शी जात होते.त्यातच गडचिरोली-चामोर्शी महामार्गावरील कुरुड गावनजिक रस्त्याच्या कडेला एक ट्रॅक्टर उभा होता.अश्यातच कुरुड गावाजवळील बसस्थानकाच्या पुढे रस्त्याच्या वळणावर उभ्या ट्रॅक्टरला दुचाकीची जोरदार धडक बसली.धडक बसताच दोघेही दूरवर फेकले जाऊन जागीच मृत्यूमुखी पडले.घटनेची माहिती चामोर्शी पोलिसांना कळताच घटनास्थळी दाखल होत मृतदेह ग्रामिण रुग्णालय चामोर्शी येथे शवविच्छेदनासाठी नेण्यात आले.सदर घटनेचा पुढील तपास चामोर्शी पोलीस ठाण्याचे पोलिस निरीक्षक अमुल कादबाने  यांच्या मार्गदर्शनाखाली पोलिस प्रशासन करीत आहे.