खुद्द जिल्हाधिकाऱ्यांसह पोलीस अधीक्षकांचा वाळू माफियांना दणका..! – ७ पोकलॅन,४ टीप्परसह १ हजार ब्रास अवैध वाळूसाठा जप्त..

गोंदिया :-अवैध वाळू उपसाच्या माध्यमातून गब्बर बनू पाहणाऱ्या वाळू माफियांना गोंदियाचे जिल्हाधिकारी प्रदीप नायर व जिल्हा पोलीस अधीक्षक गोरख भामरे यांनी दणका देत वाळू घाटावर धाड मारून तब्बल ७ पोकलॅन,४ टीप्पर आणि १ हजार ब्रास अवैध वाळूसाठा जप्त केला आहे.सदरची कारवाई काल,शनिवारी ११ जानेवारीच्या रात्री केल्याने वाळू माफियांचे धाबे दणाणले आहेत.

सध्या स्थितीत वाळू घाटांचे लिलाव झाले नसल्याने सर्वत्र मोठ्या प्रमाणावर अवैध वाळू उपसा सुरू आहे.अशातच याबाबत तालुका महसूल प्रशासनास तक्रारी करूनही त्याकडे कानाडोळा केला जात असल्याचा प्रकार उघडकीस येऊ लागला आहे. गोंदिया जिल्ह्याच्या तिरोडा तालुक्यात मोठ्या प्रमाणात अवैध वाळू उपसा व वाहतूक होत असल्याच्या अनेक तक्रारी नागरिकांनी तिरोडा महसूल विभागाकडे केल्या.मात्र,याकडे तालुका महसूल प्रशासनाने दुर्लक्ष केले.त्यामुळे नागरिकांनी थेट जिल्हाधिकारी कार्यालय गाठून याबाबत आपबिती कळवून तक्रार दाखल केली.त्यानुसार काल,शनिवारी रात्रीच्या सुमारास खुद्द जिल्हाधिकारी प्रदीप नायर आणि जिल्हा पोलीस अधिक्षक गोरख भामरे यांनी गोंदिया जिल्ह्याच्या तिरोडा तालुक्यातील

घाटकुरोडा वाळू घाटावर धाड टाकून ७ पोकलॅन,४ टीप्पर आणि १ हजार ब्रास अवैध वाळूसाठा जप्त केला आहे.

खुद्द जिल्ह्याचे जिल्हाधिकारी आणि जिल्ह्याचे पोलीस अधीक्षक अवैध वाळू उपसा प्रकरणी कारवाई करतात,मात्र,तालुका स्तरावरील महसूल विभाग व पोलीस विभाग मुंग गिळून गप्प कां? असा प्रश्न निर्माण झाला आहे.एवढी मुकसंमती असणे म्हणजे,

कुठेतरी पाणी मुरल्या जात आहे; असे म्हणजे चुकीचे ठरणार नाही.त्यामुळे वाळू चोरट्यांसह संबंधितांवर कारवाई होणे आवश्यक असल्याचा सुर सर्वत्र उमटू लागला आहे.