‘त्या’ आठ शिक्षकांवर कारवाईची टांगती तलवार.. – क्रीडा संमेलन तथा सांस्कृतिक महोत्सवात मद्यप्राशन करणे भोवले..

गडचिरोली :-जिल्ह्यात नुकतेच काही दिवसांपूर्वी तालुकास्तरीय क्रीडा संमेलन तथा सांस्कृतिक महोत्सव सर्वत्र मोठ्या उत्साहात पार पडले.अशातच एकीकडे क्रीडा संमेलनाचा महोत्सव साजरा होत असतांना आठ शिक्षकांनी एका दारूच्या अड्ड्यावर बसून दारू ढोसून उत्सव साजरा केल्याचे जिल्ह्यात उघडकीस आल्याने शिक्षण विभागात एकच खळबळ उडाली आहे.प्रकरणी ‘त्या’ आठही शिक्षकांना कारणे दाखवा नोटीस बजावून चौकशी समिती गठीत करून अहवाल मागविण्यात आल्याने कारवाईची टांगती तलवार निश्चित असल्याच्या चर्चांना उधाण आले आहे.

अधिक माहिती अशी की,गडचिरोली जिल्ह्याच्या

एटापल्ली जिल्हा परिषद हायस्कूल तथा कनिष्ठ महाविद्यालयात तालुकास्तरीय क्रीडा संमेलन व सांस्कृतिक महोत्सव २ ते ४ जानेवारीला पार पडत असतांना महोत्सवादरम्यान शिक्षकांनी गट्टा रोडवर असलेल्या एका दारूच्या गुत्त्यासमोर मद्यपान केले होते.हा सर्व प्रकार कॅमेऱ्यात कैद झाला होता. दरम्यान,समाजमाध्यमावरदेखील फोटो व्हायरल झाले होते.सदर प्रकरणाची गंभीर दखल घेत शिक्षणाधिकारी बाबासाहेब पवार यांनी कारवाईचे निर्देश दिले असून आठ शिक्षकांना गटविकास अधिकारी डॉ.आदिनाथ आंदरे यांनी कारणे दाखवा नोटीस बजावली आहे.यासंदर्भात चौकशी अहवाल मागविण्यात आला आहे.त्यानुसार ‘त्या’ आठ शिक्षकांवर कारवाई होण्याचे संकेत वर्तविण्यात येत आहे.