ऐन नगर परिषद निवडणुकीच्या तोंडावर काँग्रेसला ‘दे धक्का’.. – आजच पक्ष प्रवेश अन् आजच नगराध्यक्ष पदाची उमेदवारीही घोषित..

देसाईगंज(गडचिरोली):-राज्यातील स्थानिक स्वराज्य संस्थांच्या निवडणुकांचे बिगुल वाजले असून सर्वप्रथम नगरपरिषद आणि नगरपंचायतीच्या निवडणुका होणार आहेत.राज्य निवडणूक आयोगाकडून राज्यातील २४६ नगरपरिषदा व ४२ नगरपंचायतीसाठी निवडणूक कार्यक्रम जाहीर करण्यात आला आहे.येत्या २ डिसेंबर २०२५ रोजी यासाठी मतदान होणार आहे; तर ३ डिसेंबर २०२५ रोजी मतमोजणी होऊन नगरपरिषद आणि नगरपंचायतीच्या उमेदवारांची प्रतिष्ठा उघड होणार आहे. त्यातच उमेदवारी अर्ज दाखल करण्यासाठी अवघे तीन दिवस उरलेले असतांनाच देसाईगंज नगर परिषद क्षेत्रातील राजकारणात मोठी उलथापालथ झाल्याचे दिसून येत आहे.विशेष म्हणजे,आजच पक्ष प्रवेश अन् आजच नगराध्यक्ष पदाची उमेदवारी घोषित करण्यात आल्याने सर्वजण अवाक् झाले आहेत.

देसाईगंज नगराध्यक्षपदी ओबीसी महिला यांची वर्णी लागणार आहे.अश्यातच आज,शुक्रवार ७ नोव्हेंबरला

सामाजिक कार्यकर्त्या निता संजय गुरु,देसाईगंजचे माजी नगराध्यक्ष जेसा मोटवानी तसेच जेष्ठ अधिवक्ता संजय गुरु यांनी राज्याचे उपमुख्यमंत्री अजित पवार,प्रफुल पटेल,इंद्रनील मनोहरराव नाईक,राज्य महिला आयोगाच्या अध्यक्षा रुपाली चाकणकर,सुनील तटकरे व विविध मान्यवरांच्या उपस्थितीत अजित पवार गटाच्या राष्ट्रवादी काँग्रेस पक्षामध्ये पक्ष प्रवेश केला.यावेळी अजित पवार गटाकडून देसाईगंज नगराध्यक्षपदाच्या उमेदवारीचीही घोषणा करण्यात आली.यात सामाजिक कार्यकर्त्या निता संजय गुरु यांना देसाईगंज नगराध्यक्ष पदाची उमेदवारी घोषित करण्यात आली.यामुळे ऐन नगर परिषद निवडणुकीच्या तोंडावर काँग्रेस पक्षाला मोठा धक्का बसला आहे.देसाईगंजचे माजी नगराध्यक्ष जेसा मोटवानी आणि जेष्ठ अधिवक्ता संजय गुरु हे काँग्रेस पक्षाचे निष्ठावंत तसेच ज्येष्ठ नेते आहेत.त्यांनी काँग्रेस पक्षात राहून संपूर्ण उन्हाळे-पावसाळे अनुभवले आहेत.अश्यातच ऐन देसाईगंज नगर परिषद निवडणुकीचे उमेदवारी अर्ज दाखल करण्यास अवघे तीन दिवस उरलेले असतांनाच काँग्रेस पक्षाला रामराम ठोकून अजित पवार गटाच्या राष्ट्रवादी काँग्रेस पक्षात एंट्री केल्याने विविध राजकीय चर्चांना उधाण आले आहे.