उद्यापासून आठवडाभराचे हिवाळी अधिवेशन.. – विरोधक विविध मुद्यांवर सरकारला घेरण्याच्या प्रयत्नात..

नागपूर :-राज्याच्या विधिमंडळाचे हिवाळी अधिवेशन उद्या,सोमवार ८ डिसेंबर २०२५ पासून नागपुरात सुरू होत आहे.राज्यात २ डिसेंबर रोजी नगरपरिषद आणि नगरपंचायतींसाठी पहिल्या टप्प्याचे मतदान झाले आहे. आता २० डिसेंबर रोजी नगरपरिषद आणि नगरपंचायतींसाठी दुसऱ्या टप्प्याचे मतदान आहे. मतमोजणी २१ डिसेंबर रोजी होणार आहे.यामुळे राज्यात आचारसंहिता लागू आहे.या वातावरणातच जाहीर झालेल्या कार्यक्रमानुसार हे अधिवेशन जेमतेम आठवडाभर असेल.यंदाच्या हिवाळी अधिवेशनात विरोधक सरकारला विविध मुद्यांवर घेरण्याच्या प्रयत्नात आहेत.राज्य निवडणूक आयोगाने २ डिसेंबरच्या मतदानाला जेमतेम ४८ तास उरले असतांना निवडणुकीच्या वेळापत्रकात बदल केला.या मुद्यावर विधिमंडळात चर्चा होण्याची शक्यता आहे. मतदार यादी,मतदारसंघांचे वाटप या मुद्यांवरुन सभागृहात वातावरण तापण्याची शक्यता आहे.स्थानिक स्वराज्य संस्थांच्या निवडणुकीत राज्य निवडणूक आयोगाने घातलेला घोळ,मुंढव्यातील बेकायदा जमीन खरेदीचा व्यवहार,कथित सिडको जमीन घोटाळा,डॉ.संपदा मुंडे आत्महत्या प्रकरण या मुद्यांवर विरोधक सरकारला घेरण्याच्या प्रयत्नात असतील.तर सरकार या प्रकरणांमध्ये स्वतःची बाजू मांडेल तसेच महत्त्वाच्या विषयांवर विधिमंडळात सकारात्मक चर्चा व्हावी यासाठी प्रयत्न करेल. विरोधक अजित पवारांच्या राजीनाम्यासाठी आग्रह धरण्याची शक्यता आहे.या मुद्यावरुन कदाचित अधिवेशनाचा सर्वाधिक काळ खर्ची जाण्याची शक्यता आहे.