अवैध रेतीची वाहतूक; ट्रकसह दोघांना अटक..

चंद्रपूर :-जिल्ह्याच्या स्थानिक गुन्हे शाखेच्या उपविभाग राजुरा पथकाने आज,गुरुवार २० ऑगस्ट रोजी रामनगर पोलीस ठाण्याच्या हद्दीत अवैध रेती वाहतुकीवर मोठी केली.कारवाईत तब्बल ४० लाख रुपये किंमतीचा १६ चाकी ट्रक आणि सुमारे ६० हजार रुपये किंमतीची बारा ब्रास रेती असा एकूण ४० लाख ६० हजार रुपयांचा मुद्देमाल जप्त करण्यात आला.या प्रकरणी रामनगर पोलीस ठाण्यात कलम ३०३(२),भारतीय न्याय संहिता(बीएनएस)तसेच जमीन महसूल कायद्यान्वये दोघांविरुद्ध गुन्हा दाखल करण्यात आला असून, वाहनमालकाचा शोध सुरू आहे.शरद पुंजराम शेंद्रे वय ३९ वर्षे,रा.तादेगाव ठाकूर,ता.तिवसा,जि.अमरावती याच्यासह सिद्धार्थ विनायकराव गडलिंग वय ३३ वर्षे, रा.परतोडा,ता.आर्वी,जि.वर्धा यांच्याविरुद्ध कारवाई करण्यात आली.तर वाहनमालक समरजीत दर्शनसिंग गरेवाल रा. गुरुकुंज मोजरी,ता.तिवसा,जि.अमरावती याचा पोलिसांकडून शोध सुरू आहे.

आज स्थानिक गुन्हे शाखेच्या उपविभाग राजुरा पथकाला रामनगर पोलीस ठाण्याच्या हद्दीत गौण खनिजाची अवैधरित्या वाहतूक सुरू असल्याची गोपनीय माहिती मिळाली होती.या माहितीच्या आधारे पथकाने संबंधित ठिकाणी छापा टाकून कारवाई केली.या कारवाईत एमएच ४० सीटी ४१३३ क्रमांकाचा १६ चाकी पल्ला ट्रक आढळून आला. वाहनाची तपासणी केली असता, त्यामध्ये बारा ब्रास रेती असल्याचे निदर्शनास आले. पोलिसांनी वाहन आणि रेती ताब्यात घेतली असून जप्त करण्यात आलेल्या १६ चाकी वाहनाची अंदाजे किंमत ४० लाख रुपये,तर रेतीची किंमत सुमारे ६० हजार रुपये असा एकूण ४० लाख ६० हजार रुपयांचा मुद्देमाल जप्त करण्यात आला.