अज्ञात वाहनाची धडक; अस्वलाचा मृत्यू..

नागपूर :-रस्ता ओलांडत असतांना अज्ञात वाहनाने जोरदार धडक दिल्याने अस्वलाचा मृत्यू झाल्याची घटना कोंढाळी-अमरावती महामार्गावरील जुनापाणी गावानजीक पहाटे ४ वाजताच्या सुमारास घडली.मृत अस्वल हे मादी असून,अंदाजे १२ वर्षे वयाचे असल्याचे वनाधिकाऱ्यांनी सांगितले. कोंढाळीपासून १२ किलोमिटर अंतरावरील जुनापाणी गावानजीक रस्ता ओलांडत असतांना अज्ञात वाहनाच्या धडकेत अस्वलाचा मृत्यू झाला.याबाबत माहिती मिळताच कोंढाळी वनपरिक्षेत्रातील क्षेत्र सहाय्यक राजेश सूर्यवंशी,खापरी बिटचे वनरक्षक चन्ने,वनरक्षक नगीना मेश्राम,वनमजूर किशोर कुसळकर,पुंडलिक सरोदे आदी तातडीने घटनास्थळी पोहोचले.मृत अस्वलाचा पंचनामा करून,मृतदेह शविच्छेदनासाठी नागपूर येथील वनविभागाच्या सेमिनरी हिल्स रेस्क्यू सेंटर येथे पाठविण्यात आला.नागपूर-अमरावती महामार्गाच्या चौपदरीकरणाच्या कामात कोंढाळी भागातील संरक्षित वनात वृक्ष कटाई करून नुकसान करण्यात आले. शिवाय,मार्गाचे चौपदरीकरण करतांना वन्यप्राण्यांसाठी कोणतेही अंडरपास बांधण्यात आले नाही,त्यामुळे महामार्गावर वाघ,बिबट,अस्वल,नीलगाय आदी वन्यप्राण्यांचा वाहनाच्या धडकेने सतत मृत्यू होत आहे.यावर वनविभागाने लक्ष देण्याची गरज आहे.