अखेर शेतकऱ्यांची प्रतीक्षा संपली; ‘या’ तारखेला येणार पीएम किसानचे दोन हजार खात्यात..

उद्रेक न्युज वृत्त :-केंद्र शासनाच्या प्रधानमंत्री किसान सन्मान निधी(PM-KISAN)योजनेअंतर्गत पात्र शेतकरी कुटुंबांना दिला जाणारा २३ वा हप्ता हा येत्या,शनिवार २० जून २०२६ रोजी वितरित करण्यात येणार आहे. पंतप्रधान नरेंद्र मोदी यांच्या हस्ते येत्या शनिवारी पश्चिम बंगालच्या हुगळी जिल्ह्यातील तारकेश्वर येथून योजनेच्या हप्त्याची रक्कम वितरित होणार असून एका क्लिकवर देशभरातील शेतकऱ्यांच्या आधार संलग्न बँक खात्यात प्रत्येकी दोन हजार रुपये थेट जमा करण्यात येणार आहेत.या कार्यक्रमाचे थेट प्रक्षेपण देशभरात करण्यात येणार असून राज्यातील व विविध जिल्ह्यातील पात्र शेतकरी कुटुंबांनाही या हप्त्याचा लाभ मिळणार आहे. विशेष म्हणजे,केंद्र सरकारने हा दिवस देशभरात पीएम किसान उत्सव दिवस म्हणून साजरा करण्याचे ठरविले आहे.महाराष्ट्र राज्यातील तब्बल ९० लाख ८५ हजार शेतकऱ्यांना याचा थेट लाभ मिळणार आहे.तत्पूर्वी शुक्रवार १३ मार्च २०२६ रोजी प्रधानमंत्री यांच्या हस्ते ज्योती बिश्नु आंतरराष्ट्रीय सांस्कृतिक केंद्र,खानापारा, गुवाहाटी(आसाम)येथून २२ वा हप्ता वितरीत करण्यात आला होता.