उद्रेक न्युज वृत्त
गोंदिया :-स्कूल बस आणि दुचाकीची समोरासमोर धडक होऊन भीषण अपघातात दुचाकीस्वाराचा जागीच मृत्यू झाला.तर दुचाकीवर मागे बसलेली त्याची पत्नी गंभीर जखमी झाली.ही घटना अर्जुनी मोरगाव तालुक्यातील सिरोली-महागाव परिसरात आज गुरुवार दिनांक-१८ जुलै ला सकाळच्या सुमारास घडली.हरी कोहरे वय ४५ वर्षे,रा.महागाव ता.अर्जुनी मोरगाव असे अपघातात मृत्यू झालेल्या व्यक्तीचे नाव आहे.
हरी कोहरे हे विद्युत वितरण पारेषण अर्जुनी मोरगाव येथे शासकीय सेवेत कार्यरत होते.ते आपली रात्रपाळीतील सेवा पूर्ण करून शेतीची कामे असल्याने आपल्या पत्नीसह अर्जुनी मोरगाव वरून महागावकडे दुचाकीने जात होते.दरम्यान,सिरोली येथील राधिका पेट्रोल पंपाजवळ स्कूल बस क्रमांक – एम.एच.३५ एजे ३६३४ च्या चालकाचे वाहनावरील नियंत्रण सुटले.त्यानंतर स्कूल बसने दुचाकीला समोरून जोरदार धडक दिली.ज्यामध्ये हरी कोहरे यांच्या डोक्याला जबर मार लागल्याने त्यांचा जागीच मृत्यू झाला तर त्यांच्या पत्नी हिराबाई या गंभीर जखमी झाल्या.यावेळी काही प्रत्यक्षदर्शीनी घटनेची माहिती अर्जुनी-मोरगाव पोलिसांना दिली व जखमी हिराबाई यांना उपचारासाठी अर्जुनी मोरगाव येथील ग्रामीण रुग्णालयात हलविले.अपघाताची माहिती मिळताच पोलिसांनी घटनास्थळी जाऊन पंचनामा केला.त्यानंतर मृतदेह शवविच्छेदनासाठी पाठविण्यात आला पुढील तपास पोलीस करीत आहेत.मृतकाच्या पत्नी यांच्यावर उपचार सुरू असून त्यांचीही प्रकृती गंभीर असल्याचे बोलले जात आहे.
