सुरजागडवरून लोह खनीज भरून येणाऱ्या ट्रकची दुचाकीला धडक; एकजण ठार.. – गडचिरोलीच्या इंदिरा गांधी चौकातील घटना..

गडचिरोली :-जिल्ह्याच्या एटापल्ली तालुक्यातील सुरजागड लोह खाणीतून खनिज भरून येणाऱ्या ट्रकची दुचाकीला जोरदार धडक बसल्याने दुचाकीवरील एकजण जागीच ठार झाला तर दुसरा सुखरूप असल्याची घटना आज,रविवार २५ मे रोजी सायंकाळी साडे सहाच्या सुमारास गडचिरोली शहराच्या इंदिरा गांधी चौकात घडली.गणेश चौधरी वय २८ वर्षे, रा.ता.मुल, जि.चंद्रपूर असे अपघातात ठार झालेल्या तरुणाचे नाव असून तो खादी ग्रामोद्योग चंद्रपूर येथे नोकरीवर होता.

माहितीनुसार,सुरजागड वरून लोह खनीज वाहतूक करणारा एम एच ३४ बी जी ७१३५ क्रमांकाचा ट्रक शहराच्या इंदिरा गांधी चौकात येताच चामोर्शी मार्गाहून धानोरा मार्गे वळण घेत होता.तितक्यातच आरमोरी मार्गाहून दुचाकीने येत असलेले दोघे मित्र गणेश आणि राहुल हे सुद्धा धानोरा मार्गे जात असतांना ट्रकने त्यांच्या दुचाकीला जोरदार धडक दिली.धडक देताच दुचाकीच्या मागे बसलेला गणेश ट्रकच्या चाकाखाली आल्याने त्याचा घटनास्थळीच मृत्यू झाला.तर राहुल थोडक्यात बचावला. घटना घडताच नागरिकांनी घटनास्थळी धाव घेत मोठी गर्दी केली.काहीकाळ तणावाचे वातावरण निर्माण झाले होते.घटनेची माहिती कळताच गडचिरोली पोलिसांनी घटनास्थळ गाठत मृतदेह उत्तरीय तपासणीसाठी रुग्णालयात दाखल केला.मृत गणेश हा आज रविवार सुट्टी असल्याने मित्राला भेटायला गडचिरोली येथे आला होता.