सुरक्षेची जबाबदारी झटकून कर्तव्यावर गैरहजर.. – ११ पोलीस शिपायांसह कारकुन निलंबित..

मुंबई :-एखादी जबाबदारी दिली जाते; मात्र,ती झटकून हात वर करणारे आपण नेहमी बघत असतो.कर्तव्य बजावत असतांना कर्तव्यात कसूर करून ‘चलती का नाम गाडी’ असे अनेकांकडून केले जात आहे.असाच प्रकार पोलिसांच्या बाबतीत उघडकीस आला आहे.रिझर्व्ह बँक इमारतीच्या सुरक्षेची जबाबदारी असलेले पोलिस हजेरी लावून गायब झाल्याने एकच खळबळ उडाली.या प्रकरणी १२ पोलिसांना निलंबित करण्यात आले असून,त्यांची विभागीय चौकशी करण्यात येणार आहे.२२ सप्टेंबर रोजी नेहमीपेक्षा कमी पोलिस मनुष्यबळ असल्याचे आरबीआय व्यवस्थापनाच्या लक्षात आले. व्यवस्थापनाने पोलिस प्रशासनाकडे विचारणा केली असता ही धक्कादायक बाब उघडकीस आली.रिझर्व्ह बँकेच्या नव्या आणि जुन्या इमारतींना पोलिसांच्या सशस्त्र विभागाने सुरक्षा पुरविली आहे.रिझर्व्ह बँकेच्या सुरक्षेसाठी ८० पोलिस शिपायांची नेमणूक केली आहे.त्यापैकी १४ शिपाई २२ सप्टेंबरला कर्तव्यावर गैरहजर असल्याचे चौकशीतून निदर्शनास आले. सशस्त्र विभागाच्या कारकुनाकडे चौकशी करताच तोही रजेवर होता.चौकशीत गैरहजर असलेल्या १४ पैकी ११ जणांनी त्या दिवसाची हजेरी लावल्याचे आढळले.मात्र,ते रिझर्व्ह बँकेत कर्तव्यावर नव्हते तर मुंबईबाहेर होते.कारकुनाने त्यांची हजेरी लावल्याचे स्पष्ट होताच ११ शिपायांसह कारकुनालाही निलंबित करण्यात आले आहे.