सुडाने पेटलेला पुतण्या काकाला संपवूनच झाला शांत..!

कोरची(गडचिरोली):-शालेय शिक्षण घेत असतांना शिक्षक नेहमी सांगायचे, ‘राग हा माणसाचा सर्वात मोठा शत्रू आहे’ ज्याचे रागावर नियंत्रण आणि मनावर ताबा तो सर्वकाही जिंकू शकतो.पण,ज्याची तळपायाची आग मस्तकात गेली,तर असा व्यक्ती मागेपुढे न पाहता सर्वकाही गमावून बसतो आणि तसेच झाले गडचिरोली जिल्ह्याच्या अतिदुर्गम, आदिवासी भागातील कोरची तालुक्यात.सुडाने पेटलेला २० वर्षीय पुतण्या काकाला संपवूनच शांत झाल्याची घटना ६ मे रोजी कोरची तालुक्याच्या मुलेटीपदीकसा गावात उघडकीस आली. पुतण्याने झोपेत असलेल्या काकाच्या गळ्यावर कुऱ्हाडीने वार करून ठार केले.रामनाथ श्यामराव धुर्वे वय २० वर्षे, रा.मुलेटीपदीकसा,ता.कोरची,जि.गडचिरोली असे सनकी आरोपी पुतण्याने नाव आहे,तर पुनाराम बैसाकू धुर्वे वय ६५ वर्षे,असे मृत पावलेल्या काकाचे नाव आहे.

काही महिन्यांपूर्वी रामनाथचे डोके दुखत असल्याने त्याने आपल्या काका पुनारामांना सल्ला विचारला होता.त्यावर, डोके शांत ठेव,उगाच बडबड करत राहू नकोस,असा सल्ला काकाने त्याला दिला होता.यावर रामनाथ भभकला आणि मनात राग धरून होता.अश्यातच पुनाराम हे दोन दिवसांपूर्वी गावाजवळील शेतातील झोपडीत झोपण्यासाठी गेले होते.गाढ झोपेत असतांनाच रामनाथने पुनाराम यांच्या मानेवर कुऱ्हाडीने जोरदार प्रहार केला.यातच त्यांचा मृत्यू झाला.हत्या करताच आरोपी रामनाथने घटनास्थळीच कुऱ्हाड फेकली व पसार झाला.दुसऱ्या दिवशी म्हणजेच काल बुधवारी काही नागरिकांना पुनाराम हे शेतातील झोपडीत रक्ताच्या थारोळ्यात पडल्याचे दिसून आले.लागलीच घटनेची माहिती कोरची पोलिसांना दिली.घटनेची माहिती मिळताच कोरची पोलीस ठाण्याचे ठाणेदार शैलेंद्र ठाकरे यांनी पथकासह घटनास्थळ गाठून पंचनामा केला व मृतदेह उत्तरीय तपासणीसाठी कोरची ग्रामीण रुग्णालयात दाखल करून तपासाची चक्रे गतीने फिरवली.त्यानंतर,कोरची पोलीस ठाण्याचे एपीआय मुकुंद देशमुख व पीएसआय योगेश पवार यांच्या पथकाने सनकी आरोपी रामनाथला त्याच्या घरून अटक केली. आरोपी रामनाथ यांस आज गुरुवारी न्यायालयात हजर केले जाणार आहे.