शेतातील विहिरीत पडलेल्या वाघाच्या बछड्याला जीवदान..

नागपूर :-जिल्ह्याच्या उमरेड तालुक्यातील लोहारा शिवारात पांढर तलाव परिसरातील एका शेतातील विहिरीत वाघाचा बछडा पडल्याची वार्ता पसरताच परिसरातील नागरिकांनी घटनास्थळी धाव घेत बघ्यांनी मोठी गर्दी केली.लोहारा येथील श्रीकांत धोंगडे यांच्या शेतातील विहिरीत पडलेला वाघाचा बछडा काल बुधवारच्या सायंकाळी एका शेतमजुराच्या निदर्शनास आला.योगेश चालेकर असे या शेतमजुराचे नाव असून तो नेहमीप्रमाणे गुरे चारण्यासाठी लोहारा शिवारात गेला होता.त्याला तहान लागल्याने तो विहिरीजवळ गेला. विहिरीतील पाणी काढत असतांनाच वाघाने डरकाळी फोडली.वाघाने डरकाळी फोडताच योगेश घाबरला. विहिरीत डोकावून पाहिले असता वाघाचा बछडा त्याच्या निदर्शनास आला. लागलीच लोहारा परिसरातील विहिरीत वाघ पडल्याची वार्ता पसरताच नागरिकांसह वनविभागाची चमू घटनास्थळी दाखल झाली.बराच वेळ होऊनही वाघ बाहेर निघाला नसल्याने रात्री दहा वाजताच्या सुमारास नागपूर येथून रेस्क्यू टीम घटनास्थळी झाली आणि रात्री उशिरापर्यंत विहिरीतून वाघाला काढण्यासाठी प्रयत्न सुरू करण्यात आले.शेवटी रात्री उशिरापर्यंत वाघाला बाहेर काढून जीवदान मिळाले.

विहिरीत पडलेला वाघाचा बछडा दीड ते दोन वर्षे वयाचा असल्याचे वनाधिकाऱ्यांनी स्पष्ट केले.