विधानसभा तिकिटासाठी वाट्टेल ते..! राजकीय पक्षांमध्ये इच्छुकांची भाऊगर्दी…. – बंडखोरीचा फटका प्रत्येक राजकीय पक्षाला बसण्याची शक्यता…

गडचिरोली :-विधानसभा निवडणुकांचे बिगुल लवकरच वाजणार आहे.अशातच आगामी विधानसभा निवडणूका तोंडावर येऊन ठेपल्याने सर्वच राजकीय पक्षांमध्ये इच्छुकांची भाऊगर्दी वाढली आहे.पक्षातील दावेदार जनसंपर्क वाढविण्यावर भर देत आहेत.इच्छुक मंडळी वरिष्ठांच्या गाठीभेटी घेण्यासाठी मुंबई, दिल्लीच्या वाऱ्या करीत आहेत. भावी आमदार लग्न सोहळे,वाढदिवस, विविध आंदोलने,महाप्रसाद,तसेच धार्मिक कार्यक्रमांना हजेरी लावतांना दिसत आहेत.महायुती व महाविकास आघाडीमध्ये जागा वाटपाचा तिढा अजूनही सुटला नाही.आपल्याच पक्षाला जागा सुटेल,असा दावा निष्ठावान करीत आहेत.येत्या दहा-बारा दिवसांत आचारसंहिता लागण्याची शक्यता आहे.कोणत्या पक्षाला जागा सुटेल हे निश्चित नसल्याने इच्छुक उमेदवार व त्यांचे कार्यकर्ते बुचकळ्यात पडले आहेत.सत्ताधारी पक्षाचे कार्यकर्ते व नेते शासकीय योजनांची माहिती देण्याच्या निमित्ताने मतदारांपर्यंत पोहोचत आहेत. आगामी विधानसभा निवडणुकांसाठी महाविकास आघाडी,महायुतीत जागा वाटपाच्या चर्चा सुरू झाल्या आहेत.जिल्हा पातळीवरील नेतेमंडळी अधिकाधिक जागा आपल्याच पक्षाला सुटाव्यात,यासाठी प्रयत्न करीत आहेत.विधानसभा मतदारसंघाचे प्रतिनिधीत्व करावे,असे इच्छुकांना वाटत आहे.