वाघाच्या हल्ल्यात गुराखी ठार..!

चंद्रपूर :-गुरे चराईसाठी जंगल परिसरात गेलेल्या एका गुराख्यास वाघाने हल्ला चढवून ठार केल्याची घटना आज,शनिवार २९ नोव्हेंबर रोजी दुपारी चारच्या सुमारास चंद्रपूर वनपरिक्षेत्रातील चिचपल्ली वनपरिक्षेत्र कार्यालय हद्दीत येणाऱ्या मंदातुकुम परिसरातील महादवाडी जंगल परिसरात घडली.रमेश नागो बोमनवार वय ५५ वर्षे, रा.मंदातुकूम असे वाघाच्या हल्ल्यात ठार झालेल्या गुराख्याचे नाव आहे.

गुराखी रमेश बोमनवार हे नेहमीप्रमाणे आज शनिवारी गुरे चारण्यासाठी जंगल परिसरात गेले होते.गुरे चरत असतांनाच दबा धरून बसलेल्या वाघाने त्यांच्यावर अचानकपणे हल्ला चढवला.यात त्यांचा जागीच मृत्यू झाला.सदरची घटना चंद्रपूर वनपरिक्षेत्रातील चिचपल्ली वनपरिक्षेत्र कार्यालय हद्दीत येणाऱ्या कक्ष क्रमांक-६९६ मध्ये घडली.घटनेची माहिती स्थानिक नागरिकांकडून मिळताच वन विभागाचे अधिकारी व कर्मचारी तातडीने घटनास्थळी दाखल झाले.मृतदेह ताब्यात घेत पुढील प्रक्रिया पार पाडणे सुरू होते.आतापर्यंत वाघाच्या हल्ल्यात ३७,बिबटच्या हल्ल्यात दोन,हत्तीच्या हल्ल्यात एक व अस्वलाच्या हल्ल्यात एकाचा मृत्यू झाला असून चालू वर्षातील वन्यप्राण्यांच्या हल्ल्यातील हि ४१ वी घटना आहे.