वर्ल्ड चॅम्पियन बुद्धिबळ पटू दिव्या देशमुख आज नागपुरात..

नागपूर :-नागपूरची १९ वर्षीय वर्ल्ड चॅम्पियन बुद्धिबळ पटू दिव्या देशमुख हिचे फिडे महिला विश्व चॅम्पियन बनल्यानंतर आज,बुधवार ३० जुलै रोजी  नागपूरमध्ये रात्री ९ वाजताच्या सुमारास आगमन होणार आहे.महाराष्ट्र आणि देशाचा सन्मान उंचाविणारी विलक्षण प्रतिभेची धनी दिव्याचे नागपूर विमानतळावर भव्य स्वागत करण्यासाठी महाराष्ट्राचे मुख्यमंत्री देवेंद्र फडणवीस आणि केंद्रीय परिवहन मंत्री नितीन गडकरी उपस्थित राहणार आहेत.दिव्याने सोमवारी बाटुमी (जॉर्जिया) येथे संपलेल्या महिलांच्या फिडे विश्वचषक बुद्धिबळ स्पर्धेतील अंतिम सामन्यात सहकारी ग्रँडमास्टर कोनेरू हम्पी हिच्यावर शानदार विजय मिळवून प्रथमच जगज्जेतेपद पटकावले.त्यानंतर ती पहिल्यांदा नागपुरात परतणार आहे.दिव्याचे नागपुरात आगमन होताच मान्यवरांच्या हस्ते तिचे स्वागत करण्यात येईल,असे चेस असोसिएशन नागपूरचे अध्यक्ष गिरीश व्यास आणि सचिव भूषण श्रीवास यांनी म्हटले आहे.

यावेळी एआयसीएफचे महासचिव देव पटेल, द्रोणाचार्य पुरस्कारप्राप्त ग्रँडमास्टर अभिजित कुंटे, महाराष्ट्र बुद्धिबळ संघटनेचे अध्यक्ष आमदार परिणय फुके,आमदार कृष्णा खोपडे,आमदार प्रवीण दटके,आमदार विकास ठाकरे,आमदार डॉ.नितीन राऊत,आमदार संदीप जोशी,आमदार ॲड.अभिजित वंजारी,आमदार समीर मेघे यांच्यासह शहर भाजप अध्यक्ष आणि माजी महापौर दयाशंकर तिवारी उपस्थित राहणार आहेत.नागपुरातील सर्व बुद्धिबळ खेळाडू,पालक,अधिकारी,प्रशिक्षक,चाहते आणि बुद्धिबळप्रेमींनी दिव्याच्या स्वागताला विमानतळावर उपस्थित राहावे,असे आवाहन श्रीवास यांनी केले आहे.