लॉजमध्येच सुरू होता देहव्यापाराचा अड्डा..!

नागपूर :-लॉजमध्ये सुरू असलेल्या देहव्यापार अड्ड्याबाबत स्थानिक नागरिकांसह सामाजिक कार्यकर्त्यांनी अनेकदा तक्रारी करूनही प्रभावी कारवाई होत नसल्याने नागरिकांमध्ये नाराजी होती.अश्यातच डोक्यावरून पाणी जाताच म्हणजेच आता कारवाई केलीच पाहिजे असे म्हणत नागपूर ग्रामीण पोलिसांच्या अनैतिक मानवी वाहतूक प्रतिबंधक कक्षाने कळमेश्वर शहरातील आकाशनगर परिसरातील सुदर्शन गेस्ट हाउस लॉजमध्ये सुरू असलेल्या कथित देहव्यापाराच्या अड्ड्यावर धाड टाकून मोठी कारवाई केली.या कारवाईत लॉजचा मालक जितेंद्र गोविंद कोल्हे आणि व्यवस्थापक अजय नंदकिशोर डेहरिया यांना अटक करण्यात आली असून त्यांच्याविरुद्ध अनैतिक व्यापार (प्रतिबंध) अधिनियम तसेच भारतीय न्याय संहिता (बीएनएस)अंतर्गत गुन्हा दाखल करण्यात आला आहे.पोलिसांना मिळालेल्या गोपनीय माहितीच्या आधारे दोन दिवसांपूर्वी रात्रीच्या सुमारास सापळा रचून ही कारवाई करण्यात आली.बोगस ग्राहकाच्या माध्यमातून करण्यात आलेल्या पडताळणीत लॉजमध्ये देहव्यापार सुरू असल्याचे निष्पन्न झाले. कारवाईदरम्यान एका महिलेची सुटका करण्यात आली.मोबाइल फोन,रोख रक्कम व गेस्ट रजिस्टरसह १४ हजार ७०० रुपयांचा मुद्देमाल जप्त करण्यात आला.प्राथमिक तपासात लॉजमध्ये महिलांना पैशाचे आमिष दाखवून देहव्यापारासाठी प्रवृत्त करण्यात येत असल्याची माहिती समोर आली आहे.सदरची कारवाई नागपूर ग्रामीणचे पोलिस अधीक्षक हर्ष पोद्दार,अप्पर पोलिस अधीक्षक अनिल म्हस्के यांच्या मार्गदर्शनाखाली पोलिस निरीक्षक मिलिंद तायडे,पोलिस उपनिरीक्षक मंगेश वानखेडे व अनैतिक मानवी वाहतूक प्रतिबंधक कक्षाच्या पथकाने कळमेश्वर पोलिसांच्या सहकार्याने केली.