‘यूपिआय’ वापरकर्त्यांसाठी दिलासा; शुल्क आकारणी पुढे ढकलली..

उद्रेक न्युज वृत्त :-येत्या,गुरुवार १५ ऑक्टोंबर २०२६ पासून दोन हजार रुपयांपेक्षा जास्त रकमेच्या पात्र ‘पर्सन टू मर्चंट’ व्यवहारांवर ०.४ टक्के एमडीआर म्हणजेच ‘मर्चेंट डिस्काउंट रेट’ शुल्क लागू करण्यात येणार होता. ऐन दिवाळीच्या तोंडावर एमडीआर लागू केल्यास ग्राहकांच्या खरेदीच्या उत्साहावर आणि बाजारातील आर्थिक व्यवहारांवर परिणाम होण्याची भीती व्यक्त केली जात असतांनाच सर्वसामान्य ग्राहक व व्यापाऱ्यांना मोठा दिलासा देणारा निर्णय एनपीसीआय म्हणजेच नॅशनल पेमेंट्स कॉर्पोरेशन ऑफ इंडियाने घेतला आहे. यूपीआयद्वारे होणाऱ्या विशिष्ट मर्चेंट व्यवहारांवर लागू करण्यात येणारे मर्चेंट डिस्काउंट रेट शुल्क १५ ऑक्टोंबर ऐवजी आता दिवाळीनंतर लागू करण्यात येणार आहे. एनपीसीआयच्या ‘यूपीआय अँड सर्व्हिसेस स्टीअरिंग कमिटी’च्या बैठकीत आज मंगळवारी यावर शिक्कामोर्तब करण्यात आल्याने ग्राहकांपासून ते व्यापारी संघटना आणि पेमेंट सर्व्हिस प्रोव्हायडर्सनी समाधान व्यक्त केले आहे.विशेष म्हणजे,मर्चेंट डिस्काउंट रेट शुल्क आकारणी बाबत दिवाळीनंतर तारीख जाहीर करण्यात येणार आहे.तोपर्यंत ग्राहक तसेच व्यापारी वर्गांना दिलासा मिळाला आहे.प्रस्तावित ‘मर्चेंट डिस्काउंट रेट शुल्क’ केवळ व्यापारी वर्गांसाठी असून,सामान्य ग्राहकांसाठी यूपिआय द्वारे केले जाणारे सर्व व्यवहार नेहमीप्रमाणे पूर्णपणे मोफत राहतील.दोन हजार रुपयांपेक्षा जास्त मूल्याच्या निवडक व्यावसायिक व्यवहारांवर ०.४ टक्के शुल्क आकारण्याचे प्रस्तावित आहे.तर ७५ हजार रुपये किंवा त्यापेक्षा जास्त रकमेच्या मोठ्या व्यवहारांवर कमाल शुल्क ३०० रुपये निश्चित करण्यात आले आहे.ज्या लहान व्यापाऱ्यांचे मासिक यूपीआय उत्पन्न एक लाख रुपयांपेक्षा कमी आहे; त्यांना या शुल्कातून सूट देण्यात आली आहे.