मुली नंतर काही तासातच वडिलांनीही घेतला गळफास… – गडचिरोली जिल्ह्यातील हृदयाला धडकी भरवणारी घटना..

गडचिरोली :-गडचिरोली जिल्ह्याच्या मुलचेरा तालुक्यातील लक्ष्मीपूर येथे हृदयाला धडकी भरवणारी घटना उघडकीस आली आहे.प्रेमीयुगुलाने एकाच दोरीने गळफास लावून आत्महत्या केल्याची धक्कादायक घटना रविवारी ६ ऑक्टोंबर रोजी सायंकाळच्या सुमारास मुलचेरा तालुक्यातील लक्ष्मीपूर येथे उघडकीस आली होती.या घटनेचा पंचनामा करून पोलिसांनी मृतदेह शवविच्छेदनासाठी रुग्णालयात रवाना केले होते.अशातच आत्महत्या करणाऱ्या मुलीच्या विरहात पित्यानेही गळफास लावून आपली जीवनयात्रा संपविल्याने एकच खळबळ उडाली.अमित अनिल रॉय वय ४० वर्षे, रा.विजयनगर असे मृत पित्याचे नाव आहे.

सविस्तर वृत्त असे की,मुलचेरा तालुक्यातील लक्ष्मीपूर येथील जयदेव मिलन मंडल वय २० वर्षे व विजयनगर येथील अमेला अमित रॉय वय १८ वर्षे हे प्रेमीयुगूल शनिवारी ५ ऑक्टोंबरला घरातून गायब झाले होते. दरम्यान रात्रीच्या सुमारास त्यांनी लक्ष्मीपूर येथील शेतकऱ्याच्या शेतातील झोपडीत गळफास लावून आत्महत्या केली.सदरची घटना रविवारी सायंकाळच्या सुमारास उघडकीस येताच लक्ष्मीपूर गावात एकच खळबळ निर्माण झाली होती.मुलचेरा पोलिसांनी घटनास्थळ गाठत दोन्ही मृतदेह शवविच्छेदनासाठी रुग्णालयात पाठविले होते.अशातच मुलीने आत्महत्या केल्याची माहिती प्राप्त होताच पिता अमित अनिल रॉयही घरातून गायब झाले होते.मुलचेरा पोलिसांद्वारे त्यांचाही शोध घेतला जाता असताना मोबाल ट्रॅकिंगवरून त्यांचे लोकेशन सापडले.याअंतर्गत पोलिसांनी शोधमोहीम राबविली असता रविवारी त्याच रात्रीच्या सुमारास विजयनगर गावालगतच्या जंगलात झाडाला गळफास लावलेल्या अवस्थेत त्यांचा मृतदेह आढळून आला.

जयदेव मंडल व अमेला रॉय या प्रेमीयुगुलांनी तरुण वयात गळफास लावून आत्महत्या केल्यानंतर काही तासाच्या अवधीतच मुलीच्या चित्याला अग्नी न देताच मुलीच्या विरहात बापानेही आपली जीवनयात्रा संपविली.दोन कुटुंबातील तिघांचा जीव गेल्याने दोन्ही कुटुंबावर दुःखाचे डोंगर कोसळले आहे.