उद्रेक न्युज वृत्त
गडचिरोली :-सध्या शाळा महाविद्यालयांचे शैक्षणिक सत्र सुरू झाले आहे.तर राज्य शासनाने महिलांसाठी लाडकी बहीण योजना सुरू केली आहे.त्यामुळे विविध प्रमाणपत्रांसाठी कार्यालयांमध्ये मोठी गर्दी दिसून येते. परंतु,विविध मागण्यांसाठी महसूल कर्मचाऱ्यांनी सोमवार,१५ जुलैपासून बेमुदत संप पुकारला आहे. परिणामी,महसुली व्यवस्था ठप्प पडली असून त्याचा प्रशासकीय कामकाजावर परिणाम झाला.विविध प्रमाणपत्रे व दाखल्यांसाठी ससेहोलपट सुरू आहे.नागरिकांची राज्यभरात महसूल कर्मचाऱ्यांची रिक्त असलेली पदे तातडीने भरण्यासोबतच लाडकी बहीणसाठी आकृतिबंद तयार करण्यात यावा; यासह विविध प्रलंबित मागण्यांकरिता महाराष्ट्र राज्य महसूल कर्मचारी संघटनांनी १० जुलैपासून आंदोलनाला सुरुवात केली आहे.पहिल्या दिवशी काळ्या फिती लावून काम करण्यात आले.दुसऱ्या दिवशी संघटनेच्या पदाधिकाऱ्यांनी जिल्हाधिकारी कार्यालय परिसरात नारे निदर्शने करून शासनाचे लक्ष वेधण्याचा प्रयत्न केला.शुक्रवारला लेखनीबंद आंदोलन केली.याचा फटका तहसील कार्यालय व महसूलशी संबंधित कार्यालयामध्ये कामासाठी येणाऱ्या जनसामान्यांना बसला.तर १५ जुलैपासून बेमुदत संप पुकारला आहे.त्यात सर्व महत्त्वाचे कर्मचारी सहभागी झाल्यामुळे जात प्रमाणपत्र,रहिवाशी दाखले,उत्पन्न दाखले देण्याचे काम ठप्प होते.केवळ याचे प्रस्ताव ऑनलाईन सादर होत असले तरी महसूल सहायकांनी ते प्रस्ताव पुढे नायब तहसीलदारांच्या डेक्सवर पाठविले नाही.त्यामुळे प्रमाणपत्रे व दाखलेच निघाले नाही.त्याचा फटका सर्वसामान्यांना बसला.गौण खनिजाचे उत्पन्न मिळणार नाही.त्यामुळे गौण खनिजाचा महसूल बुडाला.संजय गांधी,इंदिरा गांधी,श्रावणबाळ निराधार योजनेचे कामे खोळंबली आहेत.
