भरधाव दुचाकी झाडावर आदळली; देसाईगंजच्या नवीन लाडज येथील इसमाचा मृत्यू..

गडचिरोली :-सरते वर्ष आणि नवीन वर्षाच्या सुरुवातीला अपघातांचे प्रमाण अधिक असते,असे अनेकजण म्हणत असतात आणि हे खरे असल्याच्या घटनाही काही ठिकाणी घडतांना दिसून येतात.अश्याच प्रकारे देसाईगंज तालुक्याच्या नवीन लाडज येथील इसमाचा दुचाकीने अपघात होऊन मृत्यू झाल्याची घटना काल गुरुवारी दुपारच्या सुमारास मोहगाव-नगरी फाट्यानजीकच्या वळणावर घडली. फुलबार भरत गिरी वय ५९ वर्षे,रा.नवीन लाडज,ता.देसाईगंज,जि.गडचिरोली असे अपघातात मृत पावलेल्या इसमाचे नाव असून ते एमएच ३३ एजे- ३०६३ क्रमांकाच्या दुचाकीने चंद्रपूर जिल्ह्याच्या राजुरा येथे काही कामानिमित्त गेले होते. तेथील कामे आटोपून चंद्रपूर-गडचिरोली मार्गाने देसाईगंजकडे परत येत असतांना गडचिरोली पासून काही अंतरावर असलेल्या मोहगाव-नगरी फाट्यानजीकच्या वळणावर येताच फुलबार यांचा दुचाकीवरील ताबा सुटला आणि अनियंत्रित झालेले वाहन मार्गावरून खाली जाऊन एका झाडाला आदळले. यात त्यांच्या डोक्याला जबर मार लागून मोठ्या प्रमाणावर रक्तस्त्राव झाला.लागलीच घटनेची माहिती पोलिसांना मिळताच घटनास्थळी धाव घेत अपघात जखमी झालेल्या फुलबार यांना गडचिरोली जिल्हा सामान्य रुग्णालयात दाखल केले.मात्र,तोपर्यंत खूप उशीर झाला होता.तिथे डॉक्टरांनी तपासणी केली असता फुलबार यांची प्राणज्योत मावळली.प्रकरणी गडचिरोली पोलिस ठाण्यात मर्ग दाखल करण्यात आला असून पुढील तपास पोलीस हवालदार मुकेश बिके करीत आहेत.