ब्रम्हपुरीत मसाज सेंटरच्या नावाखाली वेश्याव्यवसाय.. -परराज्यातील तीन महिलांची सुटका; मालक फरार.

चंद्रपूर :-शिक्षण,वैद्यकीय सुविधा आणि इतर बाबींसाठी प्रसिद्ध असलेल्या चंद्रपूर जिल्ह्याच्या ब्रम्हपुरी शहरातील मसाज सेंटरच्या नावाखाली सुरू असलेल्या वेश्याव्यवसायाचा चंद्रपूर गुन्हे शाखेच्या पथकाने भांडाफोड करून मसाज सेंटर चालविणाऱ्या मॅनेजरला (व्यवस्थापक)अटक केली,तर परराज्यातील तीन महिलांची यातून सुटका केली.प्रकरणी मसाज सेंटरचा मालक फरार झाला.२४ वर्षीय मॅनेजर करण गंगाधर मोहजनकर रा.पांजरेपार,ता.नागभीड,जि.चंद्रपूर यास ब्रम्हपुरी पोलिसांनी ताब्यात घेतले.तर मसाज सेंटरचा आरोपी मालक प्रितेश बुर्ले,रा.भवानी वॉर्ड,ब्रम्हपुरी हा अद्याप फरार आहे.आरोपी मॅनेजर यास न्यायालयात हजर केले असता न्यायालयाने त्याला दोन दिवसांची पोलीस कोठडी सुनावली आहे. चंद्रपूर स्थानिक गुन्हे शाखा तसेच ब्रम्हपुरी पोलीस ठाणे यांनी काल शनिवारी संयुक्तरीत्या कारवाई केली.

चंद्रपूर गुन्हे शाखेच्या पथकास ब्रम्हपुरी शहरातील एका मसाज सेंटरमध्ये वेश्याव्यवसाय सुरू असल्याची गोपनीय माहिती मिळाली होती.त्यानुसार,काल शनिवारी ब्रम्हपुरी शहरातील नागभिड रोड मार्गावरील गीत पेट्रोल पंपाच्या मागे असलेल्या शेषनगर येथील ‘माय हेल्थ प्रो स्पा ॲण्ड वेलनेस सेंटर’ येथे बनावट ग्राहक पाठवून पडताळणी केली असता अनैतिक देहव्यापार सुरू असल्याचे निष्पन्न झाले.लागलीच विशेष पोलिस अधिकारी,महिला पंच,समाजसेविका आणि बनावट ग्राहक यांच्या उपस्थितीत कारवाई करण्यात आली. कारवाईत मिझोरम व नागालँड राज्यातील तीन पिडीत महिलांची सुटका करण्यात आली.तर मसाज सेंटर येथून रोख रक्कम, मोबाईल, रजिस्टर,पावती बुक,स्कॅनर,कंडोम पाकिटे असा एकूण १८ हजार ६० रुपये किंमतीचा मुद्देमाल हस्तगत करण्यात आला.प्रकरणी ब्रम्हपुरी पोलीस स्टेशन ठाण्यात अनैतिक व्यापार प्रतिबंध अधिनियम १९५७ अंतर्गत कलम ३,४,५ व ७ नुसार गुन्हा दाखल करण्यात आला आहे.