बारा नक्षल्यांचा खात्मा तर तीन जवान शहीद..

उद्रेक न्युज वृत्त :-छतीसगडच्या बिजापूर जिल्ह्यातील गंगलूर पोलिस स्टेशन हद्दीतील घनदाट जंगल परिसरात आज,बुधवार ३ डिसेंबरला सुरक्षा दलाचे जवान आणि नक्षलवाद्यांमध्ये उडालेल्या चकमकीत बारा नक्षलवाद्यांचा खात्मा तर तीन जवान शहीद झाले. नक्षलवाद्यांचे बाराही मृतदेह जवानांनी ताब्यात घेतले असून परिसरात शोधमोहीम सुरू आहे.चकमकीच्या ठिकाणाहून एसएलआर रायफल,३०३ रायफल आणि दारूगोळा जप्त करण्यात आला आहे.त्याचबरोबर,मृत नक्षलिंचा आकडा वाढण्याची शक्यता वर्तविण्यात येत आहे.

आज बुधवारी जिल्हा राखीव पोलीस दल,केंद्रीय राखीव पोलीस दलासह इतर सुरक्षा दलांचे संयुक्त पथक गंगलूरच्या जंगल परिसरात शोधमोहीम राबवत होते.यादरम्यान,नक्षलींनी सुरक्षा दलांवर गोळीबार केला.याला सुरक्षा दलांनी चोख प्रत्युत्तर दिले.आज सकाळपासूनच चकमक सुरू होती.गंगलूर हा नक्षलवादाच्या दृष्टीने संवेदनशील परिसर म्हणून ओळखला जातो.परिसरात नक्षली कमांडर पापा रावचे वर्चस्व असल्याचे बोलल्या जाते.चकमकीत सुरक्षा दलाचे तीन जवान शहीद झाले आहेत.तिन्ही जवान जिल्हा राखीव पोलीस दलात कार्यरत होते.