पोलिस पाटील संघटनांचा विधानसभेवर धडकणार महामोर्चा..

उद्रेक न्युज वृत्त :-राज्यातील पोलिस पाटील संघटनांच्या वतीने येत्या,बुधवार १० डिसेंबर रोजी विधानसभेवर संयुक्त महामोर्चा काढला जाणार आहे. या मोर्चाच्या माध्यमातून पोलिस पाटलांच्या प्रलंबित मागण्यांवर तोडगा मिळवण्याचा प्रयत्न केला जाणार आहे.यासाठी सर्व पोलिस पाटलांनी मोठ्या संख्येने मोर्चात सहभागी होण्याचे आवाहन करण्यात आले आहे.

३१ ऑगस्ट २०२४ रोजी नागपूर येथे राज्यस्तरीय पोलिस पाटील अधिवेशनात तत्कालीन उपमुख्यमंत्री व विद्यमान मुख्यमंत्री देवेंद्र फडणवीस यांनी पोलीस पाटलांच्या सेवा व मागण्यांबाबत काही महत्त्वाच्या आणि सकारात्मक घोषणा केल्या होत्या.त्यामध्ये मुख्य म्हणजे पोलिस पाटलांचे सेवानिवृत्तीचे वय ६० वरून ६५ वर्षे करण्याची मागणी होती.मात्र,अजून पावेतो बऱ्याच प्रलंबित मागण्या असल्याने मोर्चा काढला जाणार आहे.मागण्यांमध्ये सर्व सेवानिवृत्त पोलिस पाटलांना सेवानिवृत्ती योजना लागू करणे,पदावर कार्यरत असतांना निधन झाल्यास वारसांना अनुकंपा नियुक्ती देणे आणि पोलिस पाटलांचा सन्मान वाढवण्यासाठी एसओपी योजना सुरू करण्याचा जाहीर घोषणा करण्यात आली होती.या घोषणांच्या वचनपूर्ततेसाठी दहा पोलिस पाटील संघटनांनी संयुक्तरित्या या महामोर्चाचे आयोजन विधानसभेवर केले आहे.त्या-त्या जिल्ह्यातील पोलिस पाटलांनी मोर्चात सहभागी होण्याचे आवाहन पोलिस पाटील संघटनांच्या वतीने करण्यात आले आहे.