नवजात बाळाला रुग्णालयात सोडून पळून गेलेल्या आईविरुद्ध सदोष मनुष्यवधाचा गुन्हा दाखल..

नागपूर :- ‘मज मायेची काया जशी ईश्वराची छाया’ या कवितेच्या ओळी प्रमाणे आपल्या पोटच्या गोळ्यांवर आई इतके प्रेम जगात कुणीही करत नाही.पण एका प्रकरणात जन्मलेल्या पोटच्या गोळ्याला रुग्णालयात सोडून पळून गेलेल्या निष्ठुर आईविरुद्ध दीड वर्षानंतर सदोष मनुष्यवधाचा गुन्हा दाखल करण्यात आला आहे.आरोपी महिला ही नागपूरच्या एकतानगर येथील रहिवासी असून ३० वर्षीय समीम असे तिचे नाव आहे.समीमला नागपूरच्या मेयो रुग्णालयाच्या प्रसूती वॉर्डमध्ये दाखल करण्यात आले होते.१ डिसेंबर २०२३ रोजी तिने मुलाला जन्म दिला.त्यानंतर ती

रुग्णालयातून पळून गेली असता ८ डिसेंबर २०२३ रोजी उपचारादरम्यान नवजात बाळाचा मृत्यू झाला.प्रकरणी डॉ.वेदांती महाले यांच्या तक्रारीवरून तहसील पोलिसांनी अपघाती मृत्यूचा गुन्हा दाखल केला होता.तेव्हापासून या प्रकरणाचा तपास प्रलंबित होता.सहाय्यक पोलीस निरीक्षक सुरेखा सागर यांनी तपास सुरू केला.नवजात मुलाच्या आजाराची माहिती असूनही,समीम त्याला सोडून पळून गेली. तिच्या कृत्यामुळे बाळाला जीव गमवावा लागला. या आधारावर,समीमविरुद्ध सदोष मनुष्यवधाचा गुन्हा दाखल करण्यात आला असल्याचे तहसील पोलीस ठाण्याच्या सहाय्यक पोलीस निरीक्षक सुरेखा सागर यांनी म्हटले आहे.