नक्षलवादी आणि सुरक्षा दलांमध्ये चकमक; ४ नक्षलवादी ठार तर एका जवानाला वीरगती…

उद्रेक न्युज वृत्त :-छत्तीसगड राज्याच्या काही भागात नक्षली मोठ्या प्रमाणावर उपद्रव माजवित आहेत.दोन दिवसांपूर्वीच छत्तीसगडच्या गरियाबंदमध्ये डीआरजी, एसटीएफ आणि सीआरपीएफच्या चमूने संयुक्त कारवाई करीत ३ नक्षलवाद्यांचा खात्मा केला होता.छत्तीसगडच्या गरियाबंद जिल्ह्याच्या इंदागाव ठाणा क्षेत्राच्या सोरनामाल जंगल परिसरात पोलिस-नक्षल चकमक झाली होती. जवानांनी मोठा फौजफाटा घेऊन नक्षल्यांना हुसकावून लावत नक्षल्यांच्या शोध मोहिमेसाठी ३०० जवान रात्री उशिरा बाहेर पडले होते.त्यातच डीआरजी,एसटीएफ आणि सीआरपीएफच्या जवानांनी तीन नक्षल्यांना ठार केले होते.अशातच आता आणखी एक बातमी समोर आली आहे; छत्तीसगडमधील अबुजमाडमध्ये नक्षलवादी आणि सुरक्षा दलांमध्ये चकमक झाली आहे.चकमकीत ४ नक्षलवादी ठार झाले असून एका जवानाला वीरगती प्राप्त झाली आहे. घटनास्थळावरून अनेक शस्त्रेही जप्त करण्यात आली आहेत.त्यामध्ये एके-४७ रायफलसह अनेक शस्त्रे जप्त करण्यात आली आहेत.अबुजमाडमध्ये नक्षल विरोधी अभियान राबविण्यात येत आहे.