चारचाकी वाहनाचा टायर फुटल्याने अपघात; दोन भाविकांचा मृत्यू तर १२ जण जखमी..

उद्रेक न्युज वृत्त :-देव दर्शनासाठी निघालेल्या भाविकांच्या चारचाकी वाहनाचा वाटेतच टायर फुटल्याने वाहन अनियंत्रित होऊन मार्गावर उलटले.अशातच त्याचवेळी भरधाव वेगात येणाऱ्या वाहनाने जोरदार धडक दिल्याने दोन भाविकांचा घटनास्थळीच मृत्यू झाला तर १२ जण जखमी झाल्याची घटना आज,शनिवारी ८ मार्चला सकाळच्या सुमारास बुलढाण्यात घडली.विद्याबाई साबळे वय ५५ वर्षे,मोतीराम बोरकर वय ६० वर्षे दोघेही रा.आसेगाव देवी,ता.बाभुळगाव, जि.यवतमाळ अशी अपघातात मृत पावलेल्या भाविकांची नावे आहेत.

अधिक माहिती अशी की,यवतमाळ जिल्ह्याच्या बाभुळगाव तालुक्यातील आसेगाव देवी येथील १४ भाविक क्रूझर गाडीने शिर्डी येथे दर्शनासाठी निघाले होते.मात्र,बुलढाण्यातील माळसावरगाव येथील मुंबई कॅरिडोरच्या पॉईंटजवळ त्यांच्या वाहनाचा टायर फुटल्याने गाडी अनियंत्रित होऊन महामार्गावर उलटली.यादरम्यान,मागून भरधाव वेगात येणाऱ्या क्रेटा कारने क्रूझरला जोरदार धडक दिली.धडक इतकी जोरदार होती की,गाडीतील १४ ही जण दाबल्या गेले.यात दोघांचा घटनास्थळीच मृत्यू झाला तर १२ जण जखमी झाले.जखमींमध्ये तिघांची प्रकृती खालावली आहे.भक्ती राऊत वय ५ वर्षे,रमेश राऊत वय ४० वर्षे,मीरा राऊत वय ६० वर्षे,छायाबाई चव्हाण वय ६५ वर्षे,प्रमिला घाटोळ वय ६० वर्षे, भावना रमेश राऊत वय ३० वर्षे,संतोष साखरकर वय २८ वर्षे,बेबीबाई येलोत वय ६० वर्षे,कमला जाधव वय ५५ वर्षे,सुशिला जाणार वय ५२ वर्षे,प्रतिभा अरुण वाघोडे वय ४५ वर्षे,मीरा गोटफोडे वय ६५ वर्षे अशी जखमींची नावे आहेत.घटनेची माहिती मिळताच महामार्ग पोलीस तसेच सिंदखेडराजा पोलीस ठाण्याचे कर्मचारी घटनास्थळी दाखल झाले.मृतदेह बाहेर काढून जखमींना रुग्णालयात दाखल केले.