घरोघरी जाऊन रेशनचे धान्य खरेदी करणाऱ्या दोघांना घेतले ताब्यात.. -दोघांविरुद्ध अत्यावश्यक वस्तू कायद्यान्वये गुन्हा दाखल..

नागपूर :-घरोघरी जाऊन नागरिकांकडून रेशनचे धान्य खरेदी करणाऱ्या दोघांना पोलिस व पुरवठा शाखेच्या संयुक्त पथकाने दोघांना ताब्यात घेत अत्यावश्यक वस्तू कायद्यान्वये गुन्हा दाखल केला आहे.शेख शोयब अकबर शेख वय २६ वर्षे,रा. आरटीओ कार्यालयाजवळ, कळमना,नागपूर व मुजैब जावेद अख्तर शेख वय २२ वर्षे,रा.विटाभट्टी चौक,नागपूर अशी गुन्हा दाखल करण्यात आलेल्या आरोपींची नावे असून दोघेही वाहन चालक आहेत.पुरवठा विभागाने केलेल्या कारवाईत प्रत्येकी ३ लाख ५० हजार रुपये किंमतीची दोन वाहने, ४३ हजार १७० रुपये किंमतीचे १०.४८ क्विंटल धान्य आणि ५५२ रुपये रोख असा एकूण ७ लाख ४३ हजार ७२२ रुपयांचा मुद्देमाल जप्त केला.जप्त केलेल्या धान्यामध्ये १४ हजार ७०० रुपये किंमतीचा ४.९० क्विंटल गहू,२२ हजार ४७० रुपये किंमतीचे ५.३५ क्विंटल तांदूळ आणि २३ किलो मक्याचा समावेश आहे.शिवाय,शंभर किलो वजन क्षमतेचे दोन वजन काटेही जप्त करण्यात आले.

नागपूर जिल्ह्याच्या कळमेश्वर तालुक्यातील गोंडखैरी

येथील वॉर्ड क्रमांक-५ मध्ये २० ऑगस्ट २०२६ रोजी दोघेही अनुक्रमे एमएच ४९ सीएफ ११७६ आणि एमएच ४९ बीएम-९५१० क्रमांकाच्या छोट्या तीनचाकी मालवाहू वाहनाने नागरिकांच्या घरोघरी जाऊन नागरिकांकडून रेशनचे धान्य खरेदी करण्यासाठी फिरत होते.तसेच नागरिकांकडून कमी दरात रेशनचे धान्य खरेदी करून संबंधित व्यक्तींना पैसेही देत होते.काही स्थानिक नागरिकांनी या प्रकाराची माहिती कळमेश्वर तहसील कार्यालयाच्या पुरवठा शाखेच्या अधिकाऱ्यांना दिली. माहिती मिळताच पुरवठा शाखेतील अधिकाऱ्यांनी पोलिस कर्मचाऱ्यांना सोबत घेत गोंडखैरी गाव गाठून पाहणी केली.अधिकारी व कर्मचाऱ्यांना पाहताच दोन्ही वाहन चालकांनी वाहनांचा वेग वाढवून पळ काढला.मात्र, पोलिसांनी पाठलाग करीत दोन्ही वाहने अडविली आणि चालकांसह वाहने व त्यातील धान्य ताब्यात घेतले व दोघांविरुद्ध अत्यावश्यक वस्तू कायद्यान्वये गुन्हा दाखल केला.सदरची कारवाई कळमेश्वर तहसील कार्यालयाचे तहसीलदार विकास बिक्कड यांच्या मार्गदर्शनात पुरवठा शाखेचे अधिकारी मंगेश ढवळे व त्यांच्या सहकाऱ्यांसह कळमेश्वर पोलीस पथकाने केली.