केवळ मतदान करू नका; तर योग्य लोकप्रतिनिधीची निवड करा… – महायुतीच्या आमदारांच्या संपत्तीत गेल्या ५ वर्षांत १२० टक्के वाढ – तर महाविकास आघाडीच्या आमदारांच्या संपत्तीत ६२ टक्क्यांची वाढ…

मुंबई :-इन्फार्मड व्होटर प्रोजेक्ट या राजकारणातील पारदर्शकता व उत्तरदायित्व वाढीसाठी कार्यरत सामाजिक संस्थेने अलीकडेच राज्यातील विद्यमान आमदार व निवडणुकीच्या रिंगणात असलेले उमेदवार यांच्या संपत्तीचे विश्लेषण करणारा अहवाल जाहीर केला आहे.संस्थेचे संस्थापक विश्वस्त विवेक गिलानी यांनी याबाबत सविस्तर माहिती दिली आहे.केवळ मतदान करू नका तर योग्य लोकप्रतिनिधीची निवड करा; असे आवाहनही संस्थेने केले आहे.

केवळ मुंबईतील आमदारांच्या संपत्तीत गेल्या चार वर्षांत झालेल्या वाढीचा विचार करता महायुतीच्या आमदारांच्या संपत्तीत सामान्य भारतीयांच्या ४३ पट तर महाविकास आघाडीच्या आमदारांच्या संपत्तीत ६ पट वाढ झाली आहे.महायुतीच्या आमदारांच्या संपत्तीत गेल्या ५ वर्षांत १२० टक्के वाढ झाली असून त्यांची संपत्ती २१.५ कोटींहून ४७.१ कोटींवर पोहोचली आहे तर महाविकास आघाडीच्या आमदारांची संपत्ती ६२ टक्क्यांनी वाढली असून १६.४ कोटींहून २६.५ कोटींवर पोहोचली आहे.

राज्यातील सत्ताधारी महायुतीच्या उमेदवारांकडील अतिरिक्त संपत्तीचे वाटप सामाजिक कार्यासाठी करायचे ठरविले तर राज्यातील समाज कल्याणाच्या योजना राबविण्यासाठी ७ हजार ३७५ कोटी उपलब्ध होतील.उदाहरणार्थ एक अंगणवाडी चालवायला ७ ते १२ लाख वार्षिक खर्च येतो.महायुतीच्या २८८ उमेदवारांकडील अतिरिक्त संपत्तीचा अंगणवाडीवर खर्च करायचा ठरविल्यास ७७ हजार ६३८ उभारल्या जाऊ शकतील.सध्या राज्यात अंगणवाडींची संख्या अतिशय कमी आहे.हा अतिरिक्त पैसा मुलांच्या आरोग्याची व सर्वसाधारण काळजी घेण्यावर खर्च केला तर ४६.६ लाख मुले व त्यांचे कुटुंब यांची काळजी घेणे शक्य होईल.