उद्रेक न्युज वृत्त
गडचिरोली :- केडमारा जंगल परिसरात पोलीस मदत केंद्र ताडगाव जंगल परिसरात दिनांक ३० एप्रिल २०२३ रोजी झालेल्या पोलीस-नक्षल चकमकीदरम्यान तीन पुरुष मृतदेह सापडल्याचे आदेशात नमूद आहे. सदर घटनेतील मृतपावलेल्या व्यक्तींच्या मृतदेहांच्या मृत्युच्या कारणांचा शोध लावणे आवश्यक असल्याने; सदर प्रकरणात फौजदारी प्रक्रिया संहिता १९७३ चे कलम १७६ अन्वये दंडाधिकारी चौकशी करावयाची आहे.तरी जाहीररित्या सुचित करण्यात येते की सदर घटनेची प्रत्यक्ष माहिती असणाऱ्या आणि चौकशीमध्ये भाग घेऊ इच्छिणाऱ्यांनी पुढील मुद्यांना अनुसरुन आपले लेखी निवेदन शपथपत्रासह उपविभागीय दंडाधिकारी,एटापल्ली येथील यांचे न्यायालयात जाहीर सूचना प्रसिद्धी झाल्यापासून १५ दिवसाचे आत किंवा तत्पूर्वी कार्यालयीन वेळेत सादर करावीत; असे उपविभागीय दंडाअधिकारी एटापल्ली शुभम गुप्ता यांनी कळविले आहे.
चौकशीमध्ये भाग घेऊ इच्छिणाऱ्यांनी पुढील मुद्यांना अनुसरुन लेखी निवेदन द्यावे.घटनेचे आपण पाहिल्याप्रमाणे वर्णन,आपला या घटने विषयीचा अनुभव,घटनेनंतर किंवा आधी या घटनेशी काही घटना घडली असल्यास त्या विषयी माहिती सरकारी किंवा अन्य यंत्रणेच्या प्रतिक्रिया किंवा सहभाग यांच्या विषयी आपले म्हणणे, या घटनेशी संबंधित इतर कोणतीही माहिती सादर करावी; असे कळविण्यात आले आहे.
