आठ वर्षीय चिमुकल्याचा तलावात पडून मृत्यु.. – कुरखेडा तालुक्यातील घटना

कुरखेडा(गडचिरोली):-शाळेलगतच्या तलावाजवळ शौचास बसलेल्या एका आठ वर्षीय चिमुकल्याचा तलावात पडल्याने मृत्यू झाल्याची दुर्दैवी घटना कुरखेडा तालुक्याच्या वडेगाव येथे काल शुक्रवारी घडली आणि आज,शनिवार २८ मार्च रोजी सर्वत्र उघडकीस आली.वेदांत शंकर पदा वय ८ वर्षे,रा.नवेझरी, ता.कुरखेडा,जि.गडचिरोली असे मृत चिमुकल्याचे नाव असून तो वडेगाव येथील क्रांतीवीर नारायणसिंह उईके आदिवासी आश्रम शाळेत इयत्ता दुसरीत शिक्षण घेत होता.

वेदांत हा काल शुक्रवारी दुपारच्या सुमारास शाळेजवळ असलेल्या तलावाजवळ शौचास बसला असता अचानकपणे त्याचा तोल जाऊन तलावातील पाण्यात पडला.तलाव पाण्याने भरलेला असल्याने त्याच्या नाका-तोंडात पाणी गेले.घटनेची माहिती मिळताच आश्रम शाळेचे अधीक्षक एच.डी.टेंभुर्णे, शाळेतील कर्मचारी व विद्यार्थ्यांनी घटनास्थळी धाव घेत त्याला पाण्याबाहेर काढले व त्याला तातडीने कुरखेडा उपजिल्हा रुग्णालयात दाखल करण्यात आले.तेथील डॉक्टरांनी तपासणीअंती त्यास मृत घोषित केले.घटनेची माहिती कुरखेडा पोलिसांना देण्यात आली.प्रकरणी कुरखेडा पोलीस ठाण्यात मर्ग दाखल करण्यात आला असून पुढील तपास पीएसआय संदीप ताराम करीत आहेत.