उद्रेक न्युज वृत्त
कुरखेडा(गडचिरोली) :- जिल्ह्यात अवैध रेतीचा धंदा जोमात सुरू असून अवैध रेतीच्या माध्यमातून अनेकजण बलाढ्य झालेले दिसून येत आहेत.कितीही कारवाई केली तरीही कारवाईला न जुमानता रेती चोरी तितक्याच ताकदीने केली जात आहे.त्यामुळे कुरखेडा येथे अवैध रेती उपसा करणाऱ्या विरोधात धडक मोहीम राबवित रात्री सती नदी पात्रातून विनापरवाना रेती वाहतूक करणारे ट्रॅक्टर जप्त करून तहसील कार्यालय कुरखेडा येथे जमा करण्यात आले आहे.
कुरखेडा तालुक्यात रात्रौ अंधाराचा फायदा घेत सती नदी पात्रातून मोठ्या प्रमाणात अवैध रेती उपसा करून वाहतूक होत असल्याची बाब येथील नव नियुक्त तहसीलदार रमेश कुंभरे यांच्या निदर्शनास आली होती.नायब तहसीलदार शाहिद शेख यांच्या नेतृत्वात भरारी पथक तयार करून रात्रौ सती नदी परिसरात गस्त लावली होती.अवैध रेती वाहतुकीस निर्बंध घालण्या करिता तयार केलेल्या पथकाच्या गस्ती दरम्यान गुरनोली तलाठी साजा. क्रमांक १ मधील अरत्तोंडी मार्गावर असलेल्या पोल्ट्री फार्म जवळ ११.३० वाजता १ ब्रास रेती भरून वाहतूक करीत असलेले ट्रॅक्टर आढळले.ट्रॅक्टर थांबवून चालक यास वाहतूक परवाना संदर्भात विचारणा केली असता परवाना नसल्याची बाबा चालक श्रीहरी पेंदाम रा. मेंढा, ता.कुरखेडा याने कबूल केल्याने सदर ट्रॅक्टरचा पंचनामा करून जप्ती करीत तहसील कार्यालय कुरखेडा येथे जमा करण्यात आले आहे.सदर कार्यवाही तहसीलदार रमेश कुंभरे यांच्या मार्गदर्शनात, नायब तहसीलदार शाहिद शेख यांच्या नेतृत्वात पथकातील मंडळ अधिकारी एल. बी. उसेंडी, तलाठी बी.आर. महाका, तलाठी सी.एस. ठाकरे, यांचा सहभाग होता.
