अनियंत्रित कार धाडकन हवेत उडून झाली पटली.. – सुदैवाने जीवितहानी टळली..

गडचिरोली :-भरधाव वेगात असलेली कार अनियंत्रित होऊन मार्गावरील कठडे तोडत एखाद्या चित्रपटातील दृश्याप्रमाणे धाडकन हवेत उडाली आणि मुख्य मार्गाच्या मध्यभागी पलटी झाल्याची घटना गुरुवारच्या मध्यरात्रीच्या सुमारास गडचिरोली शहरातील कारगील चौकात घडली.यात २२ वर्षीय कारचालक देव राहुल महात्मे हा जखमी होऊन वाहनाचे मोठे नुकसान झाले आहे.विशेष म्हणजे, मार्गावर शुकशुकाट असल्याने मोठी जीवितहानी टळली.

मध्यरात्रीच्या सुमारास देव महात्मे हा एकटाच त्याच्या कारने चंद्रपूर मार्गावरून गडचिरोली शहराकडे निघाला असतांनाच गडचिरोली शहरातील कारगील चौकात येताच त्याचे कारवरील नियंत्रण सुटले.अनियंत्रित झालेली कार सर्वप्रथम रस्त्याच्या डाव्या बाजूला असलेल्या कठड्यांना धडकली व नंतर दिशादर्शक फलकांना आदळली.धडक इतकी भीषण होती की कारचालक हा कारसह हवेत उडाला आणि कारगील स्मारकाजवळच पलटी झाली.अपघाताचा आवाज मोठ्याने झाल्याने स्थानिक नागरिकांनी घटनास्थळी धाव घेत जखमी चालकाला वाहनातून बाहेर काढले.सुदैवाने जीवितहानी टळली असली तरीही अतिवेग हा जीवावर बेतू शकतो.त्यामुळे वाहने हळू चालवणे गरजेचे आहे.